Rússar gerðu eina stærstu árás sem þeir hafa gert á höfuðborg Úkraínu, Kyiv, í morgun, en alls sendu þeir 315 dróna á Úkraínu, að sögn Volodymyrs Zelensky forseta Úkraínu.
Zelensky sagði svo að fyrir utan Kyiv og Odesa þá hafi drónar Rússa líka verið sendir til héraðanna Dnipro og Chernihiv og þá hafi 7 eldflaugum verið skotið að Úkraínu. Er sagt að tvær þeirra hafi verið framleiddar í Norður-Kóreu.
Kemur fram á RÚV að Oleg Kiper héraðsstjóri Odesa upplýsti að tveir hefðu verið drepnir þar og gríðarlega miklar skemmdir væru á borgaralegum mannvirkjum. Ráðist hafi verið á bráðamóttöku, íbúðarbyggingar og fæðingardeild, en sem betur fer var fæðingardeildin rýmd áður en drónarnir sprengdu hana í tætlur.
Í Kyiv særðust fjórir, en drónarnir hæfðu að minnsta kosti sjö hverfi í borginni, að sögn borgarstjórans þar.
kemur fram að Úkraínumenn sendu einnig dróna yfir til Rússlands og var beint að samgöngum og vopnaframleiðslu.
Vladimír Pútín forseti Rússlands hafði sagt skýrt og ákveðið frá því í símtali við Donald Trump Bandaríkjaforseta fyrir helgi, að drónaárás Úkraínumanna í Síberíu 1. júní, er eyðilagði fjölda orustuþotna Rússa, yrði hefnt grimmilega og Pútín virðist vera að standa við stóru orðin.
Viðræður um vopnahlé milli Rússa og Úkraínumanna hafa hingað til ekki borið árangur en þó hafa þjóðirnar komið á nokkuð reglulegum skiptum á stríðsföngum.
