Dagana 26. til 30. ágúst næstkomandi verður Ísland í fyrsta sinn gestgjafi alþjóðlegu Open Dialogue ráðstefnunnar, sem nú er haldin í 30. sinn.
Ráðstefnan fer fram í Hveragerði og mun hreyfa við hefðbundnum áherslum í geðheilbrigðisþjónustu með því að beina sjónum að mikilvægi mannlegra tengsla, samvinnu og hlustunar. Búist er við um 100 þátttakendum frá fjölmörgum löndum.
Hugmyndafræði Open Dialogue (Opna samtalið) leggur áherslu á að fólk sem glímir við geðrænar áskoranir fái virka rödd í eigin þjónustu. Í stað þess að ákvarðanir séu teknar án samráðs, er fjölskyldu og tengslaneti boðið að borðinu til að skapa sameiginlegan skilning og byggja upp þjónustu sem einkennist af von og virðingu.
Á meðal framsögumanna á ráðstefnunni eru virtir innlendir og erlendir sérfræðingar:
- Jaakko Seikkula, einn af helstu frumkvöðlum Open Dialogue nálgunarinnar.
- Robert Whitaker, rithöfundur og fyrirlesari sem haft hefur mikil áhrif á alþjóðlega umræðu um geðheilbrigðismál.
- Maria Ingström, læknir sem mun deila eigin reynslu af geðrofi og bata.
Sérstakur opinn dagur fyrir almenning
Skipuleggjendur leggja ríka áherslu á að málaflokkurinn varði allt samfélagið. Ráðstefnan er því opin jafnt fagfólki, notendum þjónustunnar, aðstandendum og nemendum.
Föstudaginn 28. ágúst verður boðið upp á sérstakan opinn dag þar sem almenningi gefst kostur á að taka þátt í umræðunni án þess að sækja ráðstefnuna í heild sinni.
Auður Axelsdóttir, framkvæmdastjóri Hugarafls, segir tækifærið mikilvægt fyrir íslenskt samfélag: „Við viljum skapa umræðu sem byggir á von. Von um að hægt sé að þróa geðheilbrigðisþjónustu áfram með meiri hlustun, meiri samvinnu og meiri virðingu fyrir reynslu fólks. Þetta er samtal sem við teljum að allt samfélagið eigi að taka þátt í.“
