Háskóli Íslands og Samtökin ’78 hafa undirritað tveggja ára samstarfssamning sem miðar að því að efla fræðslu og ráðgjöf um málefni hinsegin fólks og stöðu þess í menntakerfinu en HÍ greinir frá þessu á vef sínum.
Samkvæmt samningnum munu Samtökin ’78 funda árlega með jafnréttisnefnd Menntavísindasviðs HÍ um áherslur í kynja- og jafnréttisfræðum. Samtökin munu jafnframt veita kennurum ráðgjöf um námsefni sem tengist meðal annars hinseginfræði, orðanotkun, hugtökum, kyneinkennum og kyntjáningu.
Kennarar geta einnig óskað eftir sértækri fræðslu frá samtökunum innan námskeiða. Þá geta nemendafélög fengið ráðgjöf um félagslegan og menningarlegan vettvang fyrir hinsegin nemendur.
Samningurinn var undirritaður fyrr í sumar af Silju Báru R. Ómarsdóttur, rektor HÍ, Bjarndísi Helgu Tómasdóttur, formanni Samtakanna ’78, og Kolbrúnu Þ. Pálsdóttur, þáverandi forseta Menntavísindasviðs.
