Sebastian Burbano Miranda hefur verið dæmdur í 30 daga skilorðsbundið fangelsi fyrir líkamsárás gegn ungum manni við strætóskýli í Reykjavík 1. apríl 2023.
Málið var höfðað á hendur Sebastian og öðrum manni vegna tveggja árása sama kvöld. Samkvæmt ákæru hafði hinn maðurinn fyrst kýlt brotaþola í andlit utandyra við verslun í Reykjavík. Skömmu síðar var ráðist á brotaþola við strætóskýli, þar sem ákæruvaldið taldi að báðir ákærðu hefðu kýlt hann í andlitið. Brotaþoli hlaut nefbeinsbrot og brot á vanga- og kinnkjálkabeinum.
Ákærðu neituðu báðir sök. Hinn maðurinn viðurkenndi þó að hafa slegið brotaþola við verslunina en neitaði að hafa komið að árásinni við strætóskýlið. Sebastian neitaði því að hafa verið á vettvangi við strætóskýlið og kvaðst ekki hafa slegið brotaþola. Samkvæmt manninum hafði brotaþoli kallað hann „niggara“ og „slave“ og „negra“ en brotaþoli hafnaði því.
Við meðferð málsins kom fram að frásagnir brotaþola og vitna hjá lögreglu hefðu að nokkru blandast saman, enda var um tvær árásir að ræða með stuttu millibili. Dómurinn taldi hins vegar að framburðir fyrir dómi hefðu skýrt málið nægilega.
Dómurinn komst að þeirri niðurstöðu að ósannað væri að högg hins mannsins við verslunina hefði valdið beinbrotum brotaþola. Háttsemi hans félli því undir vægara ákvæði almennra hegningarlaga um líkamsárás. Þar sem brotið var orðið fyrnt þegar ákæra var gefin út var hinn maðurinn sýknaður.
Sebastian var hins vegar sakfelldur fyrir að hafa kýlt brotaþola í andlitið við strætóskýlið með þeim afleiðingum að hann nefbrotnaði. Dómurinn taldi sannað, gegn neitun Sebastian, að hann hefði veitt höggið. Framburður brotaþola og vitna þótti styðja þá niðurstöðu, auk læknisgagna og mynda af áverkum.
Við ákvörðun refsingar var litið til þess að árásin beindist að höfði brotaþola, var tilefnislaus og hafði í för með sér nefbeinabrot. Til mildunar var horft til ungs aldurs Sebastian þegar brotið var framið og þess að hann hafði ekki fyrri sakaferil þegar málið kom upp.
Sebastian var dæmdur í 30 daga fangelsi, en fullnustu refsingarinnar var frestað skilorðsbundið í tvö ár. Þá var honum gert að greiða brotaþola 500 þúsund krónur í miskabætur, auk vaxta, dráttarvaxta og 700 þúsund króna í málskostnað.
