Kristrún Frostadóttir forsætisráðherra segir frá heimsókn sinni til Akureyrar, Vopnafjarðar og Neskaupsstaðar.
Kristrún segir að rædd hafi verið vorverk ríkisstjórnarinnar á ferðalagi sínu fyrir helgi.
Kristrún segist hafa átt „gott samtal“ þar sem „byggðamálin“ voru ofarlega á baugi, og þá ekki síst staða orku- og samgönguinnviða.
Þá var einnig rætt um „leiðréttingu veiðigjalda“ og þá vildu margir ræða hvernig Ísland getur best beitt sér fyrir friði og gegn brotum á alþjóðalögum fyrir botni Miðjarðarhafs.
„Þar tel ég að við höfum mest áhrif með því að leiða saman líktþenkjandi ríki í sameiginlegum aðgerðum og þrýstingi. En ég skil vel óþreyju fólks og deili þeirri tilfinningu. Ég skynja ánægju með ríkisstjórnina þegar kemur að uppbyggingu innviða. 7 milljarða viðbót strax til vegamála og lagabreytingar í haust til að lækka rafmagnsreikninginn í dreifbýli svo dæmi séu tekin.“
Kristrún nefnir einnig að ætlunin sé „að byrja aftur að bora jarðgöng. Vinna að mótun atvinnustefnu er hafin og almenn auðlindagjöld eru á dagskrá sömuleiðis. Því við ætlum að stækka kökuna og styrkja velferðina. Með traustri verkstjórn.“
Kristrún segist hafa haft mikið gaman af því „að spjalla við krakkana í Vopnafjarðarskóla sem virðast fylgjast vel með fréttum. Sá enga síma á lofti þar. En á Akureyri talaði ég við konu með 30 ára reynslu sem kennari á gólfinu – og hún sagði frá góðri reynslu af símabanni í grunnskólum bæjarins sem hefur aukið virka þátttöku nemenda í kennslustundum.“
