Ísraelsk yfirvöld beittu farþega hjálparskipsins sem sigldi í átt að Gaza illa meðferð, þar á meðal sænska loftslagsaðgerðasinnann Gretu Thunberg, að sögn franska læknisins Baptiste André.
André, sem var sjálfur um borð í skipinu, greindi frá því við fjölmiðla eftir heimkomu til Frakklands að þó ekki hafi verið beitt beinu líkamlegu ofbeldi, hafi hann orðið vitni að því að ísraelskir landamæraverðir hafi hæðst að farþegunum og viljandi komið í veg fyrir svefn þeirra, sérstaklega Thunberg.
„Um leið og einhver sofnaði, hækkuðu þeir í tónlistinni og byrjuðu að dansa,“ sagði André.
Að sögn hans áttu farþegarnir einnig erfitt með að komast að mat og vatni.
Thunberg var einn af tólf farþegum um borð í Madleen, skipi sem skipulagt var af Freedom Flotilla-samtökunum, hreyfingu sem styður málstað Palestínu. Skipið lagði af stað frá Ítalíu 1. júní með mannúðaraðstoð til íbúa á Gaza. Ísraelski sjóherinn stöðvaði skipið snemma á mánudagsmorgni, um 200 kílómetra frá strönd Gaza, og handtók áhöfnina.
„Ég hef ekki lagalega kunnáttu til að skilgreina nákvæmlega hvað fór fram, en það voru vissulega merki um illa meðferð,“ sagði André á þriðjudag.
Samkvæmt upplýsingum frá Freedom Flotilla Coalition samþykktu fjórir farþegar, þar á meðal Thunberg og André, að undirrita brottvísunarskjöl og snúa heim síðdegis á þriðjudag. Aðrir í áhöfninni, þar á meðal franska Evrópuþingkonan Rima Hassan, eru enn í haldi í Ísrael og bíða réttarhalda.
Í myndbandi sem Thunberg tók upp fyrirfram og birti á mánudag sagði hún að hópurinn hefði verið „stöðvaður og honum rænt“ af Ísrael og hvatti sænsk stjórnvöld til að þrýsta á Benjamin Netanyahu forsætisráðherra Ísraels.
Thunberg sagði að siglingin hefði verið friðsamleg mótmælaferð gegn hafnbanni Ísraels á Gaza og vaxandi mannúðarkrísu þar.
Ísraelska ríkisstjórnin segir hins vegar að siglingin hafi verið brot á hafnbanninu og afgreiddi aðgerðina sem „sýndarmennsku“, og kallaði skipið „sjálfsmyndaskip“ (e. „selfie yacht“).
Francesca Albanese, sérstakur fulltrúi Sameinuðu þjóðanna í málefnum Palestínu hefur fordæmt handtökuna á aðgerðarsinnunum og sagt hana ólögmæta. Hvatti hún nýverið til þess að þjóðir heims tæki sig nú til og sendi fjölda hjálparskipa til Gaza.
