Á Alþingi í gær fór fram umræða um stöðu barnafjölskyldna á Íslandi en það var Diljá Mist Einarsdóttir, þingmaður Sjálfstæðisflokksins, sem hóf umræðuna og þakkaði Ragnar Þór Ingólfsson, félags- og húsnæðismálaráðherra, henni fyrir umræðuna.
Það var hins vegar Snorri Másson, þingmaður Miðflokksins, sem stal senunni með sinni ræðu en hann beindi henni sérstaklega að kjörnum borgarfulltrúum í Reykjavík. Hélt Snorri því meðal annars fram í ræðu sinni að fólk hefði hætt við að eignast börn vegna skorts á leikskólaplássum fyrir börn í Reykjavík.
„Herra forseti. Það er nú forvitnilegt að koma hingað og hlusta á þingmenn ríkisstjórnarinnar, og kannski sérstaklega Samfylkingarinnar, ræða hag barnafjölskyldna á Íslandi,“ sagði Snorri í upphafi ræðu sinnar. „Hvað hefur Samfylkingin gert fyrir barnafjölskyldur á síðustu misserum? Ég hef ekki orðið var við mikið annað hér inni á þingi en kerfisbundnar skattahækkanir sem bitna sérstaklega á barnafjölskyldum. Á sama tíma eru ríkisútgjöld aukin fram úr öllu hófi, vel að merkja í þágu eiginlega allra annarra hópa en barnafjölskyldna, en þó eru útgjöldin þannig að þau viðhalda verðbólgunni og þessum háu vöxtum sem eru að sliga barnafjölskyldurnar. Sama ríkisstjórn neitar að leyfa nýbökuðum foreldrum að skipta orlofinu á milli sín þannig að það henti þeim og sviptir það þar með þessum 12 mánuðum í heildina, af hugmyndafræðilegum ástæðum. Þessu mætti sleppa en ákveðið er að gera það ekki,“ hélt hann áfram og spurði hvað Samfylkingin hafi verið að gera fyrir barnafjölskyldur.
„Við getum rætt Reykjavíkurborg. Þar eru fjölskyldur að fresta eða hætta við barneignir vegna þess að ekki er hægt að reiða sig á leikskólapláss fyrir kannski tveggja eða jafnvel tveggja og hálfs árs börn. Það er ekki til peningur í leikskólamálin, er sagt. Það er samt til peningur til að breyta gamalli kynlífstækjaverslun í leikskóla fyrir 3,2 milljarða kr. Það er reikningurinn núna fyrir Brákarborg vegna þess að það þurfti að leggja torfþökur á þakið sem það síðan þoldi ekki með tilheyrandi viðgerðarkostnaði,“ og sagði Snorri á að Dagur B. Eggertsson, þingmaður Samfylkingarinnar, hafi fengið verðlaun fyrir bygginguna en var áður borgarstjóri Reykjavíkur
„Ekki skánaði málið hjá Reykjavíkurborg með síðustu tilraun þeirra til að telja alla vega foreldrum trú um að verið væri að huga að hagsmunum barnafjölskyldna þegar borgin fól sérfræðingum á mannréttindasviði Reykjavíkurborgar að semja leiðbeiningar um það hvernig skyldi kynjaskipta barnaafmælum í Reykjavík þannig að það samræmdist nýjustu kynjafræðikenningum mannréttindasviðsins. Nei, hún er ekki falleg, frammistaða Samfylkingarinnar í málefnum barnafjölskyldna. Ég er raunar ekki kominn hingað til að biðja Samfylkinguna um að gera meira fyrir barnafjölskyldur á Íslandi. Ég held að það sé miklu nær að biðja Samfylkinguna um að taka sér frí frá því að koma nálægt málefnum barnafjölskyldna á Íslandi. Þá fyrst held ég að hagur fjölskyldnanna færi að vænkast.“
