Síðan innrás Rússlands í Úkraínu hófst árið 2022 hafa skemmdarverk á gröfum rússneskra hermanna aukist mikið. Að minnsta kosti 55 slík tilvik hafa verið skráð, samkvæmt rannsókn blaðamanna hjá Sever.Realii. Kveikt hefur verið í gröfum, fánar fjarlægðir og hakakrossar málaðir á minnismerki.
Fyrsta þekkta atvikið átti sér stað á Krímskaga þegar kona hellti saur og blóði yfir gröf hermanns. Árið 2023 voru skráð 21 mál, þar af mörg þar sem notast var við „Z“-tákn og nasistamerki. Árið 2024 voru skráð 25 slík tilvik, þar sem unglingar og jafnvel börn komu við sögu.
Sum tilvik vöktu mikla athygli, svo sem þegar kona skildi eftir mótmælaseðil á leiði foreldra Vladimirs Pútíns. Hún fékk tveggja ára skilorðsdóm.
Rússnesk lög gera ráð fyrir allt að fimm ára fangelsi fyrir skemmdarverk á hernaðargrafreitum, en flest mál enda með skilorði eða sekt. Frá 2020 til 2024 voru 162 einstaklingar sakfelldir, en aðeins fáir þeirra hlutu raunverulegan fangelsisdóm.
