Sigmundur Davíð Gunnlaugsson, formaður Miðflokksins birti í dag meme eða jarm eins og það er stundum kallað á íslensku, þar sem skotið er föstum skotum á Þorgerði Katrínu Gunnarsdóttur, utanríkisráðherra. Píratinn fyrrverandi Björn Leví Gunnarsson svaraði hins vegar Sigmundu um hæl með öðru jarmi. Jarm er einhvers konar myndagrín sem hefur verið vinsælt á samfélagsmiðlum síðasta áratuginn.
Jarm Sigmundar Davíðs sýnir atriði úr heimildarmynd um Beckham-hjónin bresku en David, nafni Sigmundar, hvatti eiginkonu sína til að vera heiðarlega í þættinum. Í jarminu sést Þorgerður Katrín segjast vilja sjá hvað sé í boði og er þá átt við um komandi þjóðaratkvæðagreiðslu um áframhaldandi samningsviðræður við Evrópusambandið. David biður hana um að vera heiðarlega og svarar Þorgerður því til að hún sé heiðarleg. David ítrekar beiðni sína um að hún sé heiðarleg og þá segir Þorgerður að hún segi hvað sem er til að komast í ESB.
Björn Leví Gunnarsson, fyrrverandi þingmaður Pírata svarar jarmi Sigmundar á sínum eigin Facebook-vegg en í þar má sjá David biðja nafna sinn Sigmund um að vera heiðarlegan eftir að hann segist vilja bara ræða ógnina að utan, og að lokum segir Sigmundur: „Ég vil að fólk horfi á útlendinga en ekki til Wintris.“
Við færslu sína skrifar Björn Leví:
„Þessu dreifir Sigmundur Davíð um pólitískan andstæðing sinn.
Það er þó nokkuð kaldhæðnislegt að SDG sé að ásaka pólitíska andstæðinga um óheiðarleika. Að leggja þeim orð í munn svona.
Það væri álíka málefnalegt og ef Þorgerður Katrín myndi dreifa myndinni af SDG sem ég læt fylgja með hérna. Ég get hins vegar auðveldlega dreift henni, þar sem ég bjó hana til á svipaðan hátt og SDG lét líklega gera fyrir sig. Ég er hins vegar bara gaur út í bæ sem get auðveldlega gert grín að stjórnmálamönnum.
Sérstaklega þegar það er (að mínu mati og samkvæmt minni reynslu) satt.“
Miðflokkurinn hefur á árinu tapað miklu fylgi í skoðanakönnunum en í janúar á þessu ári mældist flokkurinn með 22,2 prósenta fylgi en er nú kominn í 13,4 prósent í skoðanakönnun Maskínu.
Athugasemdir