Kristi Noem, ráðherra Heimavarnaráðuneytis Bandaríkjanna, vakti mikla athygli þegar hún kynnti sér fangelsi í El Salvador á dögunum. Þar eru frelsissviptir innflytjendur sem sagðir eru hafa ferðast ólöglega til Bandaríkjanna. Svo vill til að 250 þeirra voru einnig fluttir ólöglega úr landi, af Trump-stjórninni í andstöðu við úrskurð alríkisdómara.
Það sem vakti athygli í fátæklegu umhverfinu í hinu alræmda Cecot-fangelsi í El Salvador var gullúr um úlnlið bandaríska embættismannsins. Um er að ræða sérútgáfu lúxusúraframleiðandans Rolex, sem heitir Rolex Cosmograph Daytona og selst á 50 þúsund dollara, eða rúmlega 6,6 milljónir króna.
Kristi Noem hefur verið harðlega gagnrýnd á samfélagsmiðlum fyrir smekklausan íburð í heimsókn þar sem fólk lifir við grimmilegar aðstæður.
Talsmaður heimavarnaráðherrans sagði að Noem hefði notað höfundatekjur sínar vegna bókar „til að kaupa hlut sem hún gæti gengið með og einn daginn arfleitt börnin sín að“.
Hin 53 ára gamla Noem var áður ríkisstjóri Suður-Dakóta og kom til greina sem varaforsetaefni Donalds Trump áður en hún var skipuð heimavarnaráðherra. Hún skrifaði bókina Not my First Rodeo, um upplifun sína af því að alast upp á búgarði. Þar lýsti hún því meðal annars þegar hún skaut árásargjarnan fuglaveiðihund - og „andstyggilega“ geit.
Kristi Noem er langt því frá eini stjórnmálamaðurinn til að ganga með Rolex. Það gerði líka Joe Biden, Donald Trump, Ronald Reagan og Gerald Ford. Útgáfa Noem er hins vegar ein sú fágætasta og mest eftirsótta af öllum. Hún er til þess fallin að gefa merkjaboð um ríkidæmi.
Mannréttindasamtök og fleiri hafa varað við því að fólk sé flutt án dóms og laga úr landi inn í hörmulegar aðstæður. Fangelsið var byggt árið 2023 og var því ætlað að hýsa 40 þúsund fanga.
