Ríkisútvarpið hefur ráðist í hagræðingaraðgerðir sem hafa áhrif á sem nemur tíu til fimmtán stöðugildum. Aðgerðirnar fela bæði í sér beinar uppsagnir og að ekki verði ráðið í störf sem losna en Vísir greinir frá þessu.

Stefán Eiríksson útvarpsstjóri segir RÚV standa frammi fyrir sambærilegum áskorunum og aðrir fjölmiðlar. Há verðbólga hafi aukið rekstrarkostnað á sama tíma og tekjur af þjónustu og auglýsingum hafi dregist saman.

Rekstur allra deilda Ríkisútvarpsins er nú til skoðunar. Hluti fækkunarinnar næst með því að ráða ekki í stað starfsfólks sem lætur af störfum vegna aldurs, en jafnframt verður gripið til uppsagna.

Stefán segir fækkun starfsfólks óhjákvæmilega hafa áhrif á starfsemina. Ríkisútvarpið muni þó áfram leggja áherslu á að sinna lögbundnu hlutverki sínu eins vel og kostur er.

Að sögn Stefáns er jafnframt verið að leggja mat á rekstrarhorfur næsta árs og hvernig stofnunin geti aðlagað starfsemina að breyttu efnahagsumhverfi.