Knattspyrnusamband Evrópu (UEFA) hefur hótað að sniðganga heimsmeistaramótið í knattspyrnu og allar keppnir á vegum Alþjóðaknattspyrnusambandsins (FIFA), verði samþykkt umdeild áform forseta FIFA, Giannis Infantino, um að selja einkafjárfestum eignarhluti í stærstu mótum sambandsins.
Ákvörðunin var tekin á neyðarfundi UEFA í dag þar sem fulltrúar allra 55 aðildarsambanda samþykktu samhljóða að hafna tillögunni.
„UEFA og öll 55 aðildarsambönd þess standa saman. Við höfnum einróma og afdráttarlaust tillögu FIFA um að framselja eignarhluti í heimsmeistarakeppninni og öðrum keppnum FIFA til einkafjárfesta,“ segir í yfirlýsingu sambandsins.
UEFA segir heimsmeistarakeppnina vera eina mikilvægustu arfleifð knattspyrnunnar og að hún sé ekki söluvara.
„Heimsmeistaramótið er ekki fjárfestingarvara. Það er ein stærsta íþróttaarfleifð knattspyrnunnar. Mótið hefur verið byggt upp í gegnum kynslóðir af leikmönnum, landsliðum og stuðningsmönnum um allan heim. Engum hluta þess á nokkurn tíma að afhenda einkafjárfestum. Heimsmeistaramótið er ekki til sölu.“
UEFA segir að ef tillögurnar verði ekki dregnar til baka muni ekkert landslið innan sambandsins taka þátt í keppnum á vegum FIFA.
„Engin landslið UEFA munu taka þátt í keppnum FIFA svo lengi sem þessar tillögur eru til umræðu, nema þær verði dregnar alfarið til baka og FIFA veiti bindandi tryggingar fyrir því að sambandsstjórn eða keppnir verði aldrei opnaðar fyrir einkaeign.“
UEFA gagnrýnir einnig hvernig staðið hafi verið að málinu og segir Infantino hafa gefið aðildarsamböndum FIFA aðeins 53 daga til að taka afstöðu. Jafnframt hafi hann lofað 40 milljóna dollara greiðslu til þeirra þjóða sem styðji tillögurnar, en hótað að draga greiðsluna til baka ella.
„Þetta segir allt sem segja þarf um þessa áætlun. FIFA getur ekki haldið áfram að nota íþróttina okkar til að auðga sjálft sig og vini sína,“ sagði UEFA í yfirlýsingu á miðvikudag.
Enska knattspyrnusambandið (FA) lýsti einnig yfir stuðningi við afstöðu UEFA.
„Við stöndum öxl við öxl með evrópskum samstarfsaðilum okkar og styðjum sameiginlega afstöðu þeirra. Við erum andvíg áformum FIFA – heimsmeistaramótið tilheyrir knattspyrnunni og mun ávallt gera það.“
UEFA hefur áður sagt að áform Infantino um að selja hlut í stærstu keppnum FIFA til einkafjárfesta, þar á meðal aðila tengdum fjölskyldu Donalds Trump Bandaríkjaforseta, hafi „farið yfir öll mörk“.
Til að stöðva tillögurnar þarf UEFA þó stuðning frá að minnsta kosti einu öðru álfusambandi, þar sem einfaldur meirihluti aðildarsambanda FIFA – 106 af alls 211 – nægir til að samþykkja þær.
