Taívanski áhrifavaldurinn Guava Shuishui, sem einnig gekk undir nafninu Guava Beauty, er látin, samkvæmt tilkynningu sem birt var á Instagram-reikningi hennar. Hún var aðeins 24 ára gömul.
„Því miður verðum við að segja ykkur að uppáhalds fegurðar- og matarskvísan okkar, Guava Shuishui, lagði niður fegurðarbúnaðinn sinn 24. maí 2025 og flaug til himna með óseðjandi matarlyst og bros á vör til að hefja nýja rás,“ segir í færslu sem birt var sama dag, þýdd úr kínversku af Us Weekly.
„Þótt þessi ferð hafi komið skyndilega, þá stóð Shuishui sig af krafti í hverri einustu erfiðri stund, eins og hún hefur alltaf gert, vinnusöm, einlæg og geislandi.“
Í tilkynningunni er einnig minnst á fjölmennan aðdáendahóp Shuishui, en hún var með yfir 12.000 fylgjendur á Instagram.
„Takk fyrir að líka við, skilja eftir skilaboð og hlæja með henni, og takk fyrir alla ykkar ást og stuðning,“ segir enn fremur. „Hún bar þetta virkilega í hjarta sínu og kunni afar vel að meta það. Guava Shuishui hefur bara skipt um stað, og heldur áfram að skína.“
Færslan, sem fylgdi myndbandi af Shuishui veifa til myndavélarinnar, lauk á þessum orðum:
„Þegar við hittumst aftur einn daginn, þá er hún eflaust búin að taka upp Angel-sérmerkt förðunarsett og mukbang-þátt í himnaríki.“
Dánarorsök var ekki gefin upp í tilkynningunni.
Shuishui varð þekkt fyrir að prófa snyrtivörur á einstakan hátt, með því að sleikja þær eða bíta í eftir notkun. Í einni færslu frá september prófaði hún varaliti frá Maybelline og setti síðan beint upp í sig.
„Niðurstaðan er sú,“ skrifaði hún í myndatexta, „Auðvelt í notkun, en bragðið of sterkt.“
Mánuði síðar virtist hún svara gagnrýni sem hún fékk vegna þessarar óhefðbundnu aðferðar. Í myndbandi þar sem hún prófar kinnalit, skrifaði hún: „Ég hef lengi viljað gera þetta að reglulegum lið. Þótt það veki deilur, þá elska ég þetta. Mér er alveg sama.“
Hún bætti svo við í nóvemberfærslu: „Þessi dagskrá er hvort eð er ekki ætluð börnum undir 6 ára aldri, og það er stranglega bannað að borða vörurnar.“
