Sólveig Anna Jónsdóttir, formaður Eflingar, sakar fólk sem kennir sig við kvenréttindi og femínisma um grófa kvenfyrirlitningu og hræsni í sinn garð. Í opinberri færslu á samfélagsmiðlum lýsir hún því yfir að hún hafi mætt hörðum persónuárásum og kynferðislegum svívirðingum vegna afstöðu sinnar gegn aðild Íslands að Evrópusambandinu.

Formaðurinn segir andstæðinga sína einblína á það eitt að hún sé í „vitlausu liði“ í stað þess að ræða málefnanleg rök hennar, sem lúta meðal annars að vörn fyrir íslenska vinnumarkaðsmódelið og kjör láglaunafólks.

„Perlufesta-kreistingar og ilmsalta-innandanir“

Sólveig Anna segist verða mikið vör við það á Facebook að sumt fólk sé í miklu uppnámi yfir því að hún skuli dirfast að berjast gegn ESB-aðild, fyrst og fremst vegna þess með hverjum hún standi í samtökum í þeirri baráttu. Hún segir fólk sem hún hafi áður þekkt tala um sig eins og „nokkurskonar Jezebel, fláráða og spillta“.

„Fólk sem að aldrei hefur sýnt baráttu Eflingar-kvenna nokkurn áhuga né stuðning eru í miklum perlufesta-kreistingum og ilmsalta-innöndunum vegna hegðunar minnar, sem þau fá vart afborið, svo skelfileg er hún,“ skrifar Sólveig Anna.

Hún bætir því við að þessum hópi hafi í raun aldrei fundist hún í „réttu liði“, sama hvað hún hafi tekið sér fyrir hendur á undanförnum árum.

Segir rök sín gegn ESB fara fyrir ofan garð og neðan

Í færslunni rekur Sólveig Anna helstu ástæður þess að hún leggst gegn inngöngu Íslands í Evrópusambandið. Hún telur að andstæðingar hennar hafi engan áhuga á að ræða þau rök. Meðal þeirra atriða sem hún nefnir eru:

• Vörn vinnumarkaðsmódelsins: Að verja þurfi íslenska módelið sem veiti verkafólki ríkuleg réttindi og möguleika á sameiginlegri baráttu.
• Upptaka evru: Að sú ögun á vinnumarkaði sem boðuð sé í aðdraganda evruupptöku muni fyrst og fremst bitna á verkafólki.
• Atvinnuleysi og laun: Hætta á langtímaatvinnuleysi aukist og fókus á „samkeppnishæfni“ muni hafa ömurlegar afleiðingar fyrir tilveruskilyrði verkafólks.
• Húsnæðismarkaðurinn: Að húsnæðismarkaður í löndum ESB sé mjög erfiður og slæmur fyrir láglaunafólk.

„Ekkert af þessum ástæðum hefur náð í gegn. Það eina sem registrerar er að ég er í vitlausu liði,“ segir hún.

Barátta Eflingar sögð „einskis virði“ í augum gagnrýnenda

Sólveig Anna listar upp langa röð kjarabóta og sigra sem hún telur Eflingu hafa náð undir sinni forystu, en segir gagnrýnendur sína afskrifa það allt og fela sig á bak við það hvað þeim finnst hún „ömurleg gella“.

Meðal þess sem hún nefnir sem dæmi um baráttu sem sé talin „einskis virði“ í augum þessa hóps eru krónutöluhækkanir lífskjarasamningsins, leiðrétting á sögulega vanmetnum kvennastörfum hjá Reykjavíkurborg, sérstakar hækkanir fyrir ræstingafólk og starfsfólk á hjúkrunarheimilum, sem og barátta gegn launaþjófnaði og svika-stéttarfélögum.

Sakar femínista um grófa kvenfyrirlitningu

Formaðurinn sakar fólk sem kallar sig kvenréttindasinna og femínista um algjöra þversögn og hræsni þegar það grípi til persónulegra og kynferðislegra svívirðinga þegar það er henni ósammála.

„Fólk sem kallar sig kvenréttindasinna og femínista sér allt í einu ekkert að því segja konu sem það er ósammála hafa skriðið uppí hjá hinum og þessum eða hún sé nuddandi sér utan í allskonar menn,“ segir Sólveig Anna.

Hún spyr hvort þessu fólki finnist það vera að gera það auðveldara eða öruggara fyrir konur á Íslandi að taka þátt í pólitík og aktívisma með því að kalla hana „bólfélaga auðvaldsins, sorglega druslu, auðvaldsh**u“ og þaðan af verra.

„Að reyna að þagga niður í konu með svona munnsöfnuði er skíta-kvenfyrirlitning og hluti af langri og ömurlegri hefð sem snýst um að niðurlægja og útbúa stemmningu þar sem að allt sem er sagt verður einskis virði,“ fullyrðir hún.

Sólveig Anna segir það hafa verið „smá sjokkerandi“ að sjá fólk sem hún taldi ágætis kunningja grípa til slíkra orða vegna pólitískrar skoðunar, og því hafi hana langað til að segja frá þessu. Hún lýsir því þó yfir að lokum að hún sé hress og bjartsýn og stefni á að kjósa „nei“.