Rob Reiner og eiginkona hans, Michele Singer Reiner, voru drepin af syni sínum, Nick, samkvæmt mörgum heimildum sem rætt hafa við fjölskyldumeðlimi. Lögregla hefur þó enn ekki staðfest frásögnina opinberlega. Þessu heldur miðillinn PEOPLE fram.
Í gær, 14. desember, um klukkan 15:30 að staðartíma, var slökkvilið Los Angeles (LAFD) kallað að heimili til að veita læknisaðstoð, að sögn PEOPLE. Þegar viðbragðsaðilar komu á staðinn fundu þeir látinn mann, 78 ára, og konu, 68 ára. Heimildir staðfesta að um hafi verið að ræða Rob og Michele.
Lögregla segir að Nick, sem er 32 ára, sé á lífi og sé yfirheyrður. Engar handtökur hafa farið fram.
Rob Reiner var leikstjóri, framleiðandi og leikari og á að baki feril sem spannar margar af ástsælustu kvikmyndum Hollywood. Þar má nefna leikstjórnarfrumraun hans This Is Spinal Tap (1984), Stand by Me (1986), The Princess Bride (1987), When Harry Met Sally… (1989), Misery (1990) og A Few Good Men (1992).
Hann varð fyrst landsþekktur fyrir hlutverk sitt sem Mike í sjónvarpsþáttunum All in the Family eftir Norman Lear.
Rob fæddist í Bronx í New York árið 1947. Faðir hans var hinn goðsagnakenndi grínisti Carl Reiner og móðir hans leikkonan og söngkonan Estelle Lebost.
Rob og Michele kynntust þegar Rob leikstýrði When Harry Met Sally. Þau giftu sig árið 1989 og eignuðust þrjú börn.
Áður hafði Rob verið giftur Penny Marshall, sem lést árið 2018, 75 ára að aldri, vegna fylgikvilla sykursýki.
Í viðtali við PEOPLE árið 2016 ræddi Nick um margra ára baráttu sína við fíkniefnaneyslu, sem hófst snemma á unglingsárum og leiddi meðal annars til þess að hann lifði á götunni. Hann sagðist hafa farið í og úr endurhæfingu frá um 15 ára aldri, en eftir því sem fíknin ágerðist fjarlægðist hann heimili sitt æ meir og var heimilislaus um lengri tíma í nokkrum ríkjum Bandaríkjanna.
Nick sagði PEOPLE að þetta óreiðukennda tímabil fíknarinnar, þar á meðal nætur og jafnvel vikur þar sem hann svaf utandyra, hafi síðar orðið grunnurinn að hálfsjálfsævisögulegu kvikmyndinni Being Charlie, sem hann samdi handritið að.
„Núna hef ég verið heima í mjög langan tíma og er búinn að aðlagast nokkuð því að vera aftur í Los Angeles og í kringum fjölskylduna mína,“ sagði Nick í viðtalinu á sínum tíma.
