Haukur Logi Karlsson, dósent og forseti lagadeildar Háskólans á Bifröst, telur að ný sóttvarnalög geti mögulega heimilað tímabundna skyldubólusetningu við sérstakar aðstæður. Slík ákvörðun yrði þó að standast kröfur um meðalhóf og mannréttindi.

Morgunblaðið greinir frá þessu.

Umræða hefur skapast um lögin, sem tóku gildi 1. september, og hversu langt heimildir stjórnvalda til sóttvarnaráðstafana ná.

Í 28. grein laganna er ráðherra heimilt, að fengnum tillögum farsóttanefndar og vegna samfélagslega hættulegs sjúkdóms, að setja reglugerð um sóttvarnaráðstafanir, meðal annars ónæmisaðgerðir. Bólusetningar falla undir þá skilgreiningu.

Haukur Logi segir að meta þyrfti hvort verndarhagsmunir væru nægilega ríkir og vega þá gegn réttindum einstaklinga samkvæmt stjórnarskrá og Mannréttindasáttmála Evrópu.

Guðrún Aspelund sóttvarnalæknir hefur hins vegar sagt að ekkert í lögunum kveði beinlínis á um skyldubólusetningar. Hún bendir á að heimild til reglugerðar um bólusetningar jafngildi ekki sjálfkrafa bólusetningarskyldu.