Lögreglan á höfuðborgarsvæðinu hafði í nógu að snúast í gærkvöldi og í nótt þar sem fjöldi mála kom til kasta hennar, þar á meðal ölvunarakstur, líkamsárás, þjófnaður og vinnuslys.

Alls voru níu ökumenn handteknir grunaðir um akstur undir áhrifum áfengis og/eða ávana- og fíkniefna. Í nokkrum tilvikum reyndust ökumenn jafnframt vera sviptir ökuréttindum sínum. Allir voru færðir á lögreglustöð í hefðbundið ferli.

Einnig var ökumaður stöðvaður fyrir of hraðan akstur, en hann mældist á 85 km/klst þar sem hámarkshraði er 50 km/klst og hlaut sekt vegna brotsins.

Í hverfi 220 var einn einstaklingur handtekinn grunaður um líkamsárás eftir að hafa ráðist á leigubílstjóra. Sá var vistaður í fangaklefa.

Þá barst tilkynning um þjófnað á veitingastað í hverfi 108, en málið var afgreitt á vettvangi. Jafnframt er innbrot í geymslur í hverfi 111 til rannsóknar hjá lögreglu.

Vinnuslys varð í hverfi 101 þar sem einstaklingur slasaðist í eldhúsi eftir að hafa fengið heita olíu yfir hönd. Sá var fluttur á slysadeild til frekari aðhlynningar.