Starfsfólk Matvælastofnunar (MAST) hefur á undanförnum misserum orðið fyrir óvenjulega miklu áreiti, hótunum og ærumeiðingum, samkvæmt tilkynningu frá stofnuninni. Þar kemur fram að einstaklingar hafi birt myndir af starfsfólki, nafngreint það á samfélagsmiðlum og í einstaka tilvikum í fjölmiðlum.

Að sögn MAST tengjast þessi atvik einkum afskiptum stofnunarinnar af dýrahaldi, sérstaklega þegar gripið er til þvingunarúrræða vegna brota á velferð dýra. Í tilkynningunni segir að áreitið hafi í sumum tilfellum gengið svo langt að starfsfólk upplifi sig ekki öruggt á eigin heimilum.

Dæmi eru um að starfsmenn hafi sett upp öryggiskerfi heima hjá sér og óttist jafnvel um öryggi barna sinna. Þá hafi fjölskyldumeðlimir einnig fengið skilaboð að næturlagi sem innihaldi ógnandi og óviðeigandi efni.

MAST telur ljóst að tilgangur slíkra aðgerða sé að hræða starfsfólk og hafa áhrif á framgang mála. Stofnunin leggur áherslu á að hún láti ekki undan slíkum þrýstingi og að allar hótanir verði teknar alvarlega og kærðar til lögreglu án tafar.

Í tilkynningunni er jafnframt undirstrikað að ábyrgð á þeim alvarlegu aðstæðum sem leiða til inngripa stofnunarinnar liggi hjá umráðamönnum og eigendum dýra.

Einnig segir að starfsfólk MAST geri sér grein fyrir mikilvægi starfa sinna og að það sé oft eina bjargráð dýra í neyð. Eftirlitsstörf stofnunarinnar séu því krefjandi í eðli sínu og kalli á fagmennsku við erfiðar aðstæður.