Lögreglan í Tékklandi fann í dag höfuðkúpu heilagrar Zdislavu af Lemberk sem stolið var úr kirkju í norðurhluta landsins fyrr í vikunni. Karlmaður á fertugsaldri hefur verið handtekinn vegna málsins en hann játaði að hafa brotið glerhjúp utan um höfuðkúpuna og stolið henni úr basilíkunni St. Lawrence og St. Zdislava í bænum Jablonné v Podještědí á þriðjudag.

Samkvæmt upplýsingum frá lögreglu sagðist maðurinn hafa verið ósáttur við að höfuðkúpan væri til sýnis í kirkjunni. Ætlun hans hafi verið að steypa hana í steinsteypu og sökkva henni í á til að „kveðja hana með þeim hætti“.

Petr Rajt, yfirmaður lögreglunnar á svæðinu, sagði á blaðamannafundi að höfuðkúpan hefði líklega aldrei fundist ef ekki hefði tekist að handsama manninn á fimmtudag. Þá kom fram að maðurinn hefði þegar hjúpað gripinn steinsteypu, sem geri sérfræðingum erfitt fyrir við endurheimt og varðveislu hans.

Heilög Zdislava af Lemberk fæddist um árið 1220 og var þekkt fyrir góðgerðarstörf sín. Hún var tekin í dýrlingatölu árið 1995.

Lögreglan sagði manninn hafa stolið höfuðkúpunni rétt fyrir messu á þriðjudagskvöld þegar öryggiskerfi kirkjunnar var óvirkt. Að sögn rannsóknarlögreglumannsins Jan Ujka hafði maðurinn ekki brotið af sér áður en hann hefur verið ákærður meðal annars fyrir þjófnað og gæti átt yfir höfði sér allt að átta ára fangelsisdóm verði hann fundinn sekur.