Fleiri en einn einstaklingur er grunaður í tengslum við umfangsmikla kannabisræktun sem lögregla fann í kjallara húss í Króksfjarðarnesi í síðustu viku en DV greindi fyrst frá málinu.

Grunur vaknaði um ræktunina í upphafi vikunnar og fór lögreglan á Vestfjörðum þegar á vettvang. Þar fannst umfangsmikil ræktun og lagði lögregla hald á umtalsvert magn kannabisefna.

Einn maður var handtekinn vegna málsins. Hann á brotaferil að baki en rannsóknin beinist einnig að öðrum einstaklingum.

Hlynur Snorrason, yfirlögregluþjónn hjá lögreglunni á Vestfjörðum, staðfestir við fréttastofu RÚV að fleiri en einn séu grunaðir í málinu.

Ekki hefur komið fram hversu margir eru til rannsóknar, hvert hlutverk þeirra er talið hafa verið eða nákvæmlega hversu mikið magn kannabisefna var gert upptækt.

Rannsókn lögreglu á málinu stendur enn yfir.