Sósíalistafélag Reykjavíkur hefur kynnt tíu efstu sæti á framboðslista flokksins fyrir komandi borgarstjórnarkosningar. Listinn var lagður fram af uppstillingarnefnd félagsins og samþykktur á félagsfundi laugardaginn 7. febrúar.
Í tilkynningu félagsins segir að listinn endurspegli „mikla breidd“ innan flokksins, bæði hvað varðar aldur og bakgrunn frambjóðenda, og að um sé að ræða venjulegt fólk sem brenni fyrir samfélagslegu réttlæti. Flokkurinn skilgreinir sig sem flokk í þágu almennings og leggur áherslu á að frambjóðendur komi úr ólíkum stéttum samfélagsins.
Efst á lista er Silja Sóley Birgisdóttir, stuðningsfulltrúi, en í kjölfarið fylgja meðal annars athafnakona, verslunarmaður, öryrki, stjórnmálasagnfræðingur, kennari, nemi, kvikmyndagerðarmaður, forritari og sálfræðinemi. Samkvæmt tilkynningunni er markmiðið að tryggja rödd fólks af ólíkum aldri og úr mismunandi starfsstéttum í borgarstjórn.
- Silja Sóley Birgisdóttir - Stuðningsfulltrúi 25 ára
- Sigrún E. Unnsteinsdóttir - Athafnakona 69 ára
- Hannes Pétursson - Verslunarmaður 33 ára
- Geirdís Hanna Kristjánsdóttir - Öryrki 51 árs
- Jón Ferdínand Estherarson - Stjórnmálasagnfræðingur 34 ára
- Birna Gunnlaugsdóttir - Kennari 64 ára
- Rósa Guðný Arnardóttir - Nemi 32 ára
- Halldór Ísak Ólafsson - Kvikmyndagerðarmaður 26 ára
- Jökull Sólberg Auðunsson - Forritari 40 ára
- Júnía Líf Maríuerla Sigurjónsdóttir - Sálfræðinemi 33 ára
Sósíalistar segja borgarbúa búa við margra ára lífskjarakrísu þar sem verð á nauðsynjum hafi hækkað án þess að laun fylgi eftir. Jafnframt hafi þjónusta borgarinnar hnignað vegna aukinnar útvistunar innviða. Flokkurin segist ætla að snúa þessari þróun við og telur bæði nauðsynlegt og raunhæft að gera það.
Í málefnayfirlýsingu sinni leggja Sósíalistar ríka áherslu á húsnæðismál og boða stofnun Byggingafélags Reykjavíkur sem byggi beint, ódýrt og óhagnaðardrifið húsnæði. Slagorð flokksins í þeim málaflokki er að byggja fyrir fólk en ekki fjárfesta.
Í samgöngumálum gagnrýnir flokkurinn það sem hann kallar vitleysu og aukna innviðaskuld, auk gjaldtöku einkafyrirtækja fyrir notkun á bílastæðum borgarinnar. Þá er varað við hugmyndum um einkavæðingu Strætó og boðað að Sósíalistar vilji endurheimta stjórn á innviðum borgarinnar.
Í menntamálum segja Sósíalistar nauðsynlegt að ráðast í raunverulegar aðgerðir, hlusta á starfsfólk í leik- og grunnskólum og bæta starfsaðstæður til að sporna við starfsmannaveltu. Markmiðið sé að skapa uppbyggilegt og hvetjandi skólaumhverfi þar sem bæði börn og starfsfólk blómstri.
Flokkurinn gagnrýnir jafnframt útvistun á vegum borgarinnar og segir hana leiða til verri þjónustu, lakari kjara starfsfólks og hærri kostnaðar til lengri tíma. Lögð er áhersla á að almannafé nýtist almenningi og að fjármagnið vinni fyrir fólkið.
Að lokum segir í tilkynningunni að sækja þurfi fjármagn til þeirra sem eigi það, meðal annars með því að skattleggja fjármagnstekjur til jafns við launatekjur þannig að þær skili sér til sveitarfélaga. Með því telja Sósíalistar hægt að fjármagna grunnþjónustu og skapa sanngjarnara samfélag.
Sósíalistafélag Reykjavíkur segir ljóst að næg verkefni séu fram undan og að flokkurinn ætli sér að snúa við þeirri vegferð sem verið hafi síðustu ár. Markmiðið sé að leysa lífskjarakrísuna, byggja öfluga Reykjavík og skapa borg sem virki fyrir alla.
