Karlmaður hefur verið sýknaður í Héraðsdómi Reykjaness af ákæru fyrir kynferðisbrot og brot gegn barnaverndarlögum gegn stúlku sem var tæplega 16 ára þegar meint brot átti sér stað. Atvikið átti að hafa gerst í eftirpartíi í orlofshúsi eftir nýnemaball í ónefndum skóla aðfaranótt 2. september 2023.
Manninum var gefið að sök að hafa áreitt stúlkuna kynferðislega með því að káfa á berum brjóstum hennar og reyna að kyssa hana tungukossi. Hann neitaði sök frá upphafi og kvaðst hafa farið inn í herbergi hússins til að hvíla sig vegna ölvunar og hávaða í partíinu.
Stúlkan var mjög ölvuð umrædda nótt og bar fyrir dómi að hún myndi aðeins brot úr því sem gerðist í herberginu. Hún mundi meðal annars eftir að hafa reynt að komast út um glugga og dyr en að einhver hefði hindrað hana. Hún kvaðst hins vegar ekki muna eftir samskiptum við ákærða.
Nokkur vitni gáfu skýrslu um atburðina. Eitt þeirra sagðist hafa séð manninn kyssa stúlkuna og káfa á brjóstum hennar þegar vitnið leit inn um glugga. Dómurinn taldi framburð þess vitnis hins vegar ekki nægilega áreiðanlegan, meðal annars þar sem önnur vitni sem sáu inn í herbergið báru ekki um sambærilega háttsemi.
Dómurinn taldi heldur ekki sannað að maðurinn hefði losað um leðurtopp stúlkunnar. Var niðurstaðan sú að ákæruvaldinu hefði ekki tekist að sanna sekt mannsins svo hafið væri yfir skynsamlegan vafa.
Hann var því sýknaður.
