Mikil vonbrigði er hjá þeim sem vildu kíkja í pakkann. Signý Sigurðardóttir, viðskiptafræðingur og stjórnmálakona, lýsir yfir þungum áhyggjum og miklum vonbrigðum í opinberri færslu þar sem hún sakar meirihluta þjóðarinnar og áhrifamikla hagsmunaaðila um að fórna framtíðarkjörum almennings.

Signý segir niðurstöðuna fela í sér að tækifærið til að upplifa lægri vexti, minni verðbólgu og aukna erlenda fjárfestingu á Íslandi sé glatað.

Sakar elítuna og bændur um að standa í vegi fyrir breytingum

Í færslu sinni vísar Signý beint til forystufólks á vinnumarkaði og hagsmunahópa í dreifbýli sem hún telur bera ábyrgð á því að halda Íslandi utan dýpra samstarfs við nágrannaríki.

„Meirihluti íslensku þjóðarinnar með Halldór Benjamín Þorbergsson og Sólveigu Önnu Jónsdóttur í broddi fylkingar hefur tryggt það að ég mun ekki fá að sjá breytingar í þessa veru á íslensku samfélagi í mínu lífi,“ skrifar Signý.

Hún gagnrýnir sömuleiðis stöðu íslenskra bænda og telur málflutning þeirra vinna gegn nauðsynlegri samkeppni: „Íslenskir bændur í dreifðum byggðum landsins hafa tekið frá mér tækifærið að eiga möguleika á breytingum á Íslandi sem skipta máli varðandi samkeppni og erlenda fjárfestingu.“

„Sá hópur hefur verið í forystu“

Að mati Signýjar er það fólk sem býr við mikið fjárhagslegt öryggi sem hefur knúið þessa niðurstöðu fram, á kostnað þeirra sem finna harðast fyrir íslenska efnahagskerfinu. „Fólkið sem aldrei þarf að hafa áhyggjur af því hvort það eigi fyrir því sem það á greiða um mánaðarmótin hefur sigrað. Sá hópur hefur verið í forystu fyrir því að þetta er niðurstaðan.“

Signý dregur ekki dul á að ákvörðunin fái mikið á hana persónulega og segist vera bæði sár og reið eftir litla svefnró.

„Ég er búin að sofa í 5 tíma og ég er rosalega sár. Rosalega sár og reið og þið skuluð ekki láta ykkur detta í hug annað. Ég hef þráð breytingar á gjörspilltu íslensku samfélagi allt mitt líf. Þið sem kusuð nei hafið séð til þess að það mun ég ekki sjá í þessu lífi.“

Hún lýkur færslunni á svörtu útliti fyrir framtíðina þar sem hún segir krónuna og fákeppnina hafa unnið leikinn: „Íslensk króna, fákeppni, háir vextir, há verðbólga. Ísland án áhuga erlendra fjárfesta að koma inn. Það er ykkar Ísland – ekki mitt.“