Ráðuneytisstjóri utanríkisráðuneytisins kallaði fulltrúa rússneska sendiráðsins á Íslandi á fund í morgun þar sem alvarlegum athugasemdum var komið á framfæri vegna framferðis Rússlands.

Þorgerður Katrín Gunnarsdóttir utanríkisráðherra greindi frá þessu í hádegisfréttum Bylgjunnar. Sagði hún að samstaða Íslands með Þýskalandi hefði verið áréttuð vegna drónaatviks í Leipzig í síðasta mánuði. Fulltrúi Rússlands hefði tekið við skilaboðunum.

Þorgerður sat fund utanríkisráðherra Evrópusambandsríkja á Írlandi í gær.

„Það var nefnt á fundinum að það á bara að kalla þessar ógnir því sem þær heita, sem er bara hryðjuverk,“ sagði Þorgerður

Þýsk stjórnvöld sökuðu Rússa á þriðjudag um að hafa flogið dróna með sprengiefni inn á flugvöll í Leipzig. Rússnesk stjórnvöld hafa hafnað ásökununum og sakað Þjóðverja um að hafa komið fyrir sönnunargögnum.