Þrjú voru handtekin vegna gruns um nytjastuld á ökutæki á höfuðborgarsvæðinu í gærkvöldi og nótt. Fólkið var vistað í fangaklefa lögreglu og er málið til rannsóknar.
Þetta kemur fram í dagbók lögreglunnar á höfuðborgarsvæðinu.
Nokkuð var um umferðarlagabrot á vaktinni. Tveir ökumenn voru kærðir fyrir verulegan hraðakstur þar sem hámarkshraði er 80 kílómetrar á klukkustund. Annar mældist á 113 kílómetra hraða en hinn á 119 kílómetra hraða.
Þá var ökumaður handtekinn vegna gruns um akstur undir áhrifum fíkniefna og fluttur á lögreglustöð. Hann var látinn laus að lokinni blóðsýnatöku.
Þrír ökumenn voru kærðir fyrir að aka þrátt fyrir að hafa verið sviptir ökuréttindum og einn til viðbótar fyrir akstur án þess að hafa öðlast ökuréttindi.
Einn ökumaður var kærður fyrir notkun farsíma undir stýri auk þess að hafa ekki veitt gangandi vegfarendum forgang á gangbraut. Annar var kærður vegna óvirks ljóss á bifreið sinni.
Lögreglu var jafnframt tilkynnt um innbrot í heimahús.
Tvö umferðarslys komu til kasta lögreglu á vaktinni en engin slys urðu á fólki. Einnig var tilkynnt um bílveltu. Þar urðu sömuleiðis engin meiðsl á fólki.
