Knattspyrnumaðurinn Jón Daði Böðvarsson hefur ákveðið að leggja skóna á hilluna, 34 ára að aldri. Hann greindi frá ákvörðun sinni í færslu á Instagram og segir þar komið að leiðarlokum eftir langan feril í atvinnumennsku og með íslenska landsliðinu.

Jón Daði rifti á laugardag samningi sínum við uppeldisfélagið Selfoss, þar sem hann hafði leikið að undanförnu. Hann hóf meistaraflokksferil sinn hjá félaginu og lýkur því ferlinum á sömu slóðum og hann hófst.

„Góðir hlutir taka enda. Ég hef ákveðið að hætta í leiknum sem ég elska,“ segir Jón Daði í færslunni. Hann rifjar þar upp að áhugi hans á knattspyrnu hafi kviknað þegar hann var aðeins sex ára gamall og lýsir þakklæti fyrir að hafa fengið tækifæri til að gera fótboltann að atvinnu sinni.

Jón Daði átti langan feril erlendis og lék meðal annars í Noregi, Þýskalandi og Englandi. Þá var hann um árabil fastamaður í íslenska landsliðinu og tók þátt í tveimur stærstu knattspyrnumótum sem Ísland hefur komist á.

Hann var í íslenska landsliðshópnum sem komst í átta liða úrslit á Evrópumótinu í Frakklandi árið 2016 og lék einnig með Íslandi á heimsmeistaramótinu í Rússlandi tveimur árum síðar. Alls lék Jón Daði 64 A-landsleiki fyrir Íslands hönd og skoraði í þeim fjögur mörk.

Í kveðju sinni þakkar Jón Daði þeim fjölmörgu þjálfurum, leikmönnum og starfsmönnum sem hann kynntist á ferlinum. Hann beinir jafnframt þökkum til stuðningsmanna þeirra félaga sem hann lék fyrir og segist alltaf hafa reynt að gefa allt sitt á vellinum.

Sérstakar þakkir fær eiginkona hans fyrir stuðninginn í gegnum árin og þær fórnir sem hún hafi fært vegna knattspyrnuferils hans.

„Þú hefur verið kletturinn minn á erfiðum tímum og minn stærsti stuðningsmaður. Og besta móðir sem börnin okkar hefðu getað óskað sér,“ skrifar Jón Daði.

Hann lýkur færslunni með einföldum orðum: „Takk fyrir allt.“