Héraðsdómur Reykjavíkur hefur dæmt Jonas Asanavicius í 15 mánaða fangelsi fyrir stórfellt fíkniefnalagabrot. Hann var sakfelldur fyrir að hafa tekið á móti og haft í vörslum sínum tæplega 1,3 kíló af kókaíni sem ætlað var til söludreifingar hér á landi.
Samkvæmt dómi var Asanavicius handtekinn á pósthúsinu við Síðumúla í Reykjavík 8. júní síðastliðinn. Þar hafði hann tekið á móti samtals 1.289,86 grömmum af kókaíni með 80 til 81 prósents styrkleika.
Fíkniefnin höfðu verið falin í fjórum pottum sem komu til landsins í tveimur póstsendingum í maí. Í annarri sendingunni voru rúm 702 grömm af kókaíni en tæp 587 grömm í hinni.
Asanavicius játaði brot sitt skýlaust bæði við rannsókn málsins og fyrir dómi. Í dóminum kemur fram að ekkert bendi til þess að hann hafi átt fíkniefnin eða tekið þátt í að skipuleggja kaup eða innflutning þeirra. Hann hafi þess í stað samþykkt gegn greiðslu að sækja efnin á pósthúsið og afhenda þau þriðja aðila.
Við ákvörðun refsingar var meðal annars litið til þess að hann hefði ekki áður gerst sekur um refsiverða háttsemi, játað brotið og verið samvinnuþýður við rannsóknina. Á móti vó að um umtalsvert magn af sterku kókaíni var að ræða.
Dómurinn ákvað refsingu hans 15 mánaða fangelsi.
Kókaínið var gert upptækt ásamt tveimur farsímum. Þá var Asanavicius dæmdur til að greiða rúmar tvær milljónir króna í málsvarnarþóknun, aksturskostnað og annan sakarkostnað.
