Lögreglan á höfuðborgarsvæðinu hafði í nógu að snúast í gærkvöldi og í nótt vegna fjölda útkalla sem tengdust þjófnuðum, akstri undir áhrifum ávana- og fíkniefna, ofbeldisbrotum og umferðarlagabrotum víðs vegar um umdæmið.

Í Reykjavík voru tveir menn handteknir grunaðir um þjófnað úr verslun. Þeir voru síðar látnir lausir að lokinni skýrslutöku.

Í hverfi 108 var maður í annarlegu ástandi handtekinn vegna gruns um rán. Hann var vistaður í fangageymslu. Þá var einnig tilkynnt um þjófnað úr verslun í sama hverfi og málið afgreitt á vettvangi.

Í miðborginni var tilkynnt um þjófnað úr verslun og málið afgreitt á vettvangi. Síðar um nóttina var maður í annarlegu ástandi handtekinn vegna líkamsárásar og brots á vopnalögum. Hann var vistaður í fangageymslu. Minniháttar meiðsli urðu í tengslum við málið.

Lögregla stöðvaði einnig fjölda ökumanna vegna gruns um akstur undir áhrifum ávana- og fíkniefna eða áfengis. Í Laugardalnum var ökumaður stöðvaður vegna gruns um akstur undir áhrifum fíkniefna og látinn laus að lokinni blóðsýnatöku.

Í Reykjavík kom í ljós við eftirlit að ökumaður hafði verið sviptur ökuréttindum. Málið var afgreitt á vettvangi.

Í hverfi 105 var tilkynnt um þjófnað á reiðhjóli. Lögreglu tókst að hafa uppi á meintum þjófi og hjólinu var komið til eiganda síns á ný.

Í Garðabæ voru tveir ökumenn stöðvaðir, annar vegna gruns um ölvunarakstur og hinn vegna gruns um akstur undir áhrifum fíkniefna. Báðir voru látnir lausir að lokinni blóðsýnatöku.

Í Árbænum voru þrjú mál skráð. Einn ökumaður var stöðvaður vegna gruns um akstur undir áhrifum fíkniefna og reyndist hann hafa töluvert magn fíkniefna í fórum sínum. Hann var vistaður í fangageymslu. Annar ökumaður var einnig stöðvaður vegna gruns um akstur undir áhrifum fíkniefna og kom þá í ljós að hann hafði verið sviptur ökuréttindum. Hann var látinn laus að lokinni blóðsýnatöku. Þá var ökumaður kærður fyrir of hraðan akstur eftir að hafa mælst á 120 km hraða þar sem hámarkshraði er 80 km á klukkustund. Málið var afgreitt með sekt.