Ferðamenn, þar á meðal aldraðir og börn, féllu í sjóinn eftir óhugnanlegt atvik undan ströndum Dóminíska lýðveldisins á dögunum.
Tugir farþega af skemmtiferðaskipi enduðu á svamli á hafi úti eftir að tvíbytna, sem þeir voru í í dagsferð, sökk skyndilega.
Litli báturinn, sem hét Boca de Yuma, var að flytja farþega frá þýska skemmtiferðaskipinu Mein Schiff 1 þegar hann fór að taka inn vatn og sökk á örskotsstundu. Um borð voru 55 manns sem neyddust til að stökkva í sjóinn.
Dagsferðin breyttist í martröð þegar ferðamenn flutu hjálparlausir um í sólinni yfir flóa Samaná-bæjarins þar til sjóher Dóminíska lýðveldisins kom til bjargar. Þjóðerni farþeganna er ekki vitað að svo stöddu.
Myndskeið sýna sjóliða kasta björgunarhringjum til ferðamannanna og draga þá svo um borð í björgunarbát. Aðeins lítill hluti tvíbytnunnar sást áður en hann hvarf í djúpið. Fólk úr nærsamfélaginu El Crucero tók einnig þátt í björguninni.
Allir komust lífs af, en einn farþeganna sagði við þýska sjónvarpsstöðina RTL að „hræddir“ farþegar hefðu „ekki fengið neina umönnun“ af hálfu áhafnar skemmtiferðaskipsins. „Skipið mitt veitti enga aðstoð og virtist ekki einu sinni vita af atvikinu,“ sagði hann.
Hafnarstjórnin sagði í yfirlýsingu:
„Sjóher Dóminíska lýðveldisins vinnur náið með yfirvöldum á staðnum að því að bera kennsl á þá sem bera ábyrgð og grípa til aðgerða til að koma í veg fyrir að svona endurtaki sig.“
Ferðafélagið TUI Cruises, sem rekur Mein Schiff 1 og hélt frá La Romana, staðfesti að fulltrúar þess væru í samráði við skipuleggjanda ferðarinnar og lögreglu til að rannsaka orsök slyssins.
Talskona fyrirtækisins sagði:
„Tvíbytnan sem sökk var í eigu utanaðkomandi þjónustuaðila. Við erum í nánu sambandi við þann aðila og yfirvöld til að fá staðreyndir málsins upp á borðið.“
Allir farþegar komust aftur um borð í Mein Schiff 1 eftir atvikið á sunnudag. Skemmtiferðaskipið, sem rúmar allt að 4.000 farþega, heldur nú ferð sinni áfram samkvæmt áætlun, næsti viðkomustaður er Jamaíka.
