Þorgerður Katrín Gunnarsdóttir utanríkisráðherra átti í fyrradag símafund með Hakan Fidan utanríkisráðherra Tyrklands en greint er frá þessu í tilkynningu frá stjórnvöldum.

Ráðherrarnir ræddu sameiginleg hagsmunamál sem og vaxandi tvíhliða samstarf ríkjanna á alþjóðasviðinu.

„Ég þakkaði honum fyrir þann áhuga sem tyrknesk stjórnvöld hafa sýnt Íslandi og norðurslóðum að undanförnu. Þjóðir okkar eiga í góðum tvíhliða samskiptum og við erum auðvitað bandamenn til áratuga í Atlantshafsbandalaginu,“ segir Þorgerður Katrín. „Þá tilkynnti hann mér ósk stjórnvalda í Tyrklandi um að koma á fót sendiráði hér á Íslandi síðar á þessu ári. Þetta eru góðar fréttir, enda mikilvægt að treysta tengslin við bandamenn okkar í Atlantshafsbandalaginu. Það er einnig ánægjulegt að finna fyrir auknum áhuga og ábyrgð vegna Norður-Atlantshafsins og norðurslóða.“

Þá voru málefni Gaza, Úkraínu og Grænlands sömuleiðis til umræðu á símafundi ráðherranna.