Samband ungra Sjálfstæðismanna birti á dögunum myndskeið á samfélagsmiðlunum sem hefur fengið mikið áhorf en sitt sýnist hverjum um ágæti þess.
Myndskeiðið er ein stór árás á Ingu Sæland mennta- og barnamálaráðherra en myndskeiðið kalla SUS-arar Icelandic Horror Story eða Íslensk hryllingssaga og er þar vitnað í hinu vinsælu sjónvarpsþætti American Horror Story. Í myndskeiðinu má sjá klippur úr fréttum af Ingu Sæland og þeim skeytt saman þannig að einhvers konar saga er sögð. Til dæmis byrjar myndskeiðið á part úr ræðu Kristrúnar Frostadóttur forsætisráðherra þar sem hún segir „Og nú, er hún hæstvirtu félags og húsnæðismálaráðherra. Hvar annars staðar en á Íslandi? Hvar annars staðar á Íslandi gæti þetta gerst?“. Birtast síðar ýmis myndefni frá Ingu, þar sem hún meðal annars svarar spurningum fréttamanna, syngur eða brýtur niður vegg. Þá má einnig sjá úrklippur úr blaðagreinum sem fjalla um hneykslismál sem upp hafa komið í tengslum við störf Ingu á Alþingi. Að lokum kemur upp á skjáinn orðin The Real Valkyrja of Iceland eða Hin raunverulega valkyrja Íslands.
Þegar þessi frétt er skrifuð hefur verið horft á myndskeiðið 22 þúsund sinnum og fjölmargir hafa líkað við það, deilt og skrifað athugasemdir.
Athugasemdirnar benda þó til þess að myndskeið SUS-ara hafi farið illa í flesta og eru Sjálfstæðismennirnir ungu sakaðir meðal annars um barnaskap.
„Eruð þið 5 ára?“ skrifar Fjölnir nokkur og Sigurjón Pétur skrifar: „Það er það heimskulegasta í pólitík að gera aumkunarverða tilraun til að gera lítið úr mótherjum.“
Hinn umdeildi Eldur Smári Kristinsson tjáir sig einnig í athugasemdum og er hneykslaður eins og margir:
„Þetta er meira að segja á lágu plani í mínum bókum. Er Inga allt of alþýðleg? Er hún ekki nógu fín?
Er það málið?“
