Halldóra Mogensen, fyrrverandi þingkona Pírata, segir að hörð stefna í fíkniefnamálum geti haft þveröfug áhrif og ýtt undir aukið ofbeldi og hættulegri starfsemi í undirheimum.
Í Facebook-færslu frá í dag vísar hún til reynslu vinar síns, bresks fyrrverandi leynilögreglumanns, Neil Woods, sem starfaði við að síast inn í fíkniefnagengi og hefur síðar gagnrýnt svokallað stríð gegn fíkniefnum. Woods hafi meðal annars skrifað bókina Good Cop Bad War þar sem hann fjallar um reynslu sína og áhrif stefnu stjórnvalda.
„Ég á vin sem vann lengi sem leynilögreglumaður í Bretlandi. Hlutverk hans innan lögreglunnar var að síast inn í hættulegustu fíkniefnagengi Bretlands, vingast við fótgönguliðana áður en hann tókst á við glæpaforingjana. Hann skrifaði bók um reynslu sína og lærdóm sem heitir “Good Cop Bad War”.“
Samkvæmt Halldóru hefur Woods bent á að aðgerðir lögreglu, svo sem rassíur, handtökur og haldlagningar, leiði oft til þess að glæpahópar aðlagi sig og þrói nýjar og ofbeldisfyllri aðferðir. Hún líkir þróuninni við vopnakapphlaup milli yfirvalda og undirheima.
Halldóra segir að reynsla annarra landa, þar á meðal Svíþjóðar, sýni að aukin harka í fíkniefnamálum leiði ekki til minni dreifingar efna né dragi úr eftirspurn. Þá bæti hún ekki öryggi samfélagsins heldur geti hún aukið hættuna.
„Það sem við á Íslandi getum lært af Svíum og öðrum löndum sem hafa haldið áfram leið ofbeldis í fíkniefnamálum er að því meira sem við aukum hörkuna gagnvart glæpagengjum því harðari verða gengin.“
Að hennar mati ýtir slík stefna frekar undir verri aðstæður og dýpkar fíkniefnavanda í samfélaginu.
„Harka löggjafarinnar og lögreglunar hefur engin áhrif á magn efna í umferð, hún hefur engin áhrif á eftirspurn og hún eykur ekki öryggi samfélagsins. Þvert á móti ýtir hún undir mun hættulegri aðstæður og dýpkar vímuefnavandann á Íslandi.“
