Stofnaður hefur verið Minningarsjóður Elmars Péturssonar, en hann lést sviplega þann 14. janúar síðastliðinn eftir skyndilegt hjartastopp. Elmar, sem var tveggja ára, reyndist vera með Long QT syndrome af tegund 1 (LQT1), sem er arfgengur og leyndur hjartasjúkdómur. Fjölskylda og vinir standa nú fyrir söfnun og vakin verður athygli á málefninu í tengslum við hlaup þann 22. ágúst næstkomandi.
Elmari er lýst sem einstaklega lífglöðum dreng, miklu náttúrubarni og miklum gleðigjafa sem var óendanlega elskaður af fjölskyldu sinni og öllum þeim sem honum kynntust. Skyndilegt fráfall hans skildi eftir sig stórt skarð, en með stofnun sjóðsins og sérstöku minningarhlaupi áformar fjölskyldan að halda minningu hans á lofti og breyta sársaukanum í liðsinni við aðra.
Hjartsláttartruflanir og skyndidauði
Hjartasjúkdómurinn Long QT1 getur valdið lífshættulegum hjartsláttartruflunum og skyndidauða en einstaklingar sem bera þennan genagalla eru með helmingslíkur á að bera hann áfram til afkomenda. Aðstandendur Elmars leggja ríka áherslu á mikilvægi þess að auka vitund og fræðslu um sjúkdóminn almennt svo hægt sé að greina hann í tæka tíð og koma í veg fyrir ótímabært andlát.
Laugardaginn 22. ágúst verður hlaupið til heiðurs Elmari. Almenningi gefst kostur á að sýna samstöðu með því að skrá sig í hlaupið, heita á hlaupara eða styrkja minningarsjóðinn beint. Allur ágóði rennur til minningarsjóðsins, sem mun styðja fjölskylduna við að varðveita minningu hans ásamt því að efla fræðslu um Long QT- heilkennið.
Þeir sem vilja leggja málefninu lið geta lagt inn á eftirfarandi reikning:
- Minningarsjóður Elmars Péturssonar
- Reikningsnúmer: 0537-14-013259
- Kennitala: 530726-0880
