Tilkynnt var um vasaþjófnað við Hallgrímskirkju í Reykjavík en þetta kom fram í dag dagbók lögreglu í gærkvöldi og í nótt. Gerendur fundust ekki og hvetur lögregla fólk til að vera sérstaklega á varðbergi á fjölförnum ferðamannastöðum í borginni.

Lögregla biðlar jafnframt til almennings að tilkynna verði vart við grunsamlega háttsemi eða vasaþjófnaði.

Nokkur útköll bárust vegna slagsmála í miðborg Reykjavíkur. Þá sinnti lögregla einnig hávaðakvörtun vegna samkvæmishávaða.

Töluvert var um afskipti lögreglu af ökumönnum vegna gruns um akstur undir áhrifum áfengis eða fíkniefna. Tveir ökumenn voru stöðvaðir grunaðir um akstur undir áhrifum vímuefna og reyndust báðir vera án ökuréttinda. Annar þeirra var jafnframt eftirlýstur og var hann vistaður í fangageymslu í þágu rannsóknar málsins.

Þá voru þrír aðrir ökumenn stöðvaðir vegna gruns um akstur undir áhrifum áfengis og/eða vímuefna.

Einn ökumaður, sem hafði verið sviptur ökuréttindum, var stöðvaður við akstur. Samkvæmt upplýsingum lögreglu reyndi hann að framvísa skilríkjum í blekkingarskyni.

Tvö umferðarslys urðu þar sem lögregla kom að málum en enginn var talinn slasaður. Þá varð umferðarslys við Vesturlandsveg í tengslum við framúrakstur. Ein bifreið hafnaði þar utan vegar en ekki var talið að slys hefðu orðið á fólki.

Loks var lögregla kölluð til vegna þjófnaðar í matvöruverslun. Sá sem grunaður var um þjófnaðinn var látinn laus að loknum framburði.