Vöruviðskipti við Ísrael stórjukust á Íslandi árið 2024 og náði meira en þremur milljörðum króna.
Undanfarin 10 ár hefur útflutningur frá Íslandi til Ísraels aukist jafnt og þétt en mestur var hann árið 2022 en þá fluttu Ísraelar inn íslenskar vörur fyrir 334 milljónir króna. Innflutningur frá Ísrael til Íslands var árið 2023, 831 milljónir en rauk upp árið 2024 og fór í 3.353 milljarða króna. Það er 303,4 prósent aukning milli ára. Upplýsingarnar eru fengnar frá Hagstofu Íslands.
Athyglisvert er að sjá hversu gríðarlega mikil aukningin er á innflutningi frá Ísrael til landsins frá því 7. október 2023, þegar Ísraelsher hóf stórfelldar árásir á Gaza, í kjölfar voðaverka Hamas-liða í Ísrael. Sjaldan eða aldrei hafa jafn margir jarðarbúar sniðgengið vörur frá Ísrael og nú, enda her landsins grunaður um þjóðarmorð á Palestínumönnum.
Mannlíf hafði samband við Hagstofu Íslands til að fá útskýringu á þessari gríðarlegu aukningu á innflutningi frá Ísrael en í skriflegu svari kemur fram að ástæðan sé umfangsmikill innflutningur á tölvuvörum hjá fyrirtækjum sem reka gagnaver hér á landi.
„Innflutningur hefur aukist gríðarlega að undanförnu vegna umfangsmikils innflutnings á tölvuvörum hjá þeim fyrirtækjum sem reka gagnaver hér á landi. Þessi aukning sem þú vísar til fellur undir þann innflutning. Tollskrárnúmerið sem þessi innflutningur fellur undir er 85176200, Vélar fyrir móttöku, umbreytingar og sendingar á rafrænum gögnum, einnig skiptar og beinar, routers.“
Undanfarna mánuði hefur þrýstingur aukist til muna á íslensk yfirvöld vegna þjóðarmorðs Ísraela og hafa bæði stuðningsmenn Palestínu hér á landi og miðstjórn ASÍ krafist viðskiptabanns á Ísrael.
