Matvælastofnun, Náttúrufræðistofnun Íslands og Tilraunastöð Háskóla Íslands í meinafræði að Keldum halda áfram vöktun á svokölluðum smitferjum í sumar, meðal annars moskítóflugum, mítlum og lúsmýi. Almenningur er hvattur til að tilkynna grun um moskítóflugur og safna mítlum sem finnast á fólki eða dýrum. Þetta kemur fram í umfjöllun Bændablaðsins.
Ástæða aukinnar vöktunar er meðal annars sú að moskítóflugur fundust í fyrsta sinn á Íslandi síðasta haust. Um var að ræða tegundina Culiseta annulata, sem fannst í Kjós og er útbreidd víða í Evrópu.
Samkvæmt Náttúrufræðistofnun hefur tegundin aðlagast köldu loftslagi og getur lifað af veturinn með því að leita skjóls í meðal annars útihúsum og kjöllurum. Talið er líklegt að flugan hafi borist til landsins með vöruflutningum og að hún geti lifað við íslenskar aðstæður.
Hlýnandi loftslag og auknir vöruflutningar eru taldir skýra fjölgun nýrra skordýrategunda sem greinst hafa hér á landi á undanförnum árum.
Yfirvöld hvetja fólk sem finnur mítil á sér eða dýrum sínum til að senda sýnið til Náttúrufræðistofnunar eða Tilraunastöðvarinnar að Keldum. Mikilvægt er að upplýsingar fylgi um hvenær og hvar mítillinn fannst, hvort hann hafi verið á manni eða dýri og hvar viðkomandi hafi verið á ferð undanfarna daga.
Þeir sem verða varir við moskítóflugur eru jafnframt hvattir til að tilkynna það til Náttúrufræðistofnunar og senda með staðsetningu fundarins og ljósmynd ef mögulegt er.
