Yfirvöld í japönsku borginni Maebashi, norður af Tókýó, hafa ákveðið að loka skólum á morgun vegna bjarnar sem gengur laus í íbúðahverfum borgarinnar. Að minnsta kosti einn maður hefur slasast eftir árás dýrsins, samkvæmt fréttum japanskra fjölmiðla.
Leit að birninum stóð yfir í dag en yfirvöldum hafði áður tekist að fanga bjarnarhún sem sást á ferli ásamt öðru dýri í íbúðahverfi. Talið er að björninn sem enn er leitað að sé móðir húnsins.
Akira Ogawa, borgarstjóri Maebashi, hvatti íbúa til að halda sig innandyra og lýsti ástandinu sem afar hættulegu.
Í færslu á samfélagsmiðlinum X hvatti hún sérstaklega íbúa á þeim svæðum þar sem birnirnir hefðu sést til að forðast óþarfa ferðir út fyrir heimili sín og setja eigið öryggi í forgang.
Borgarstjórinn staðfesti jafnframt að einn einstaklingur hefði slasast. Japanskir fjölmiðlar greindu frá því að maður á sextugsaldri hefði orðið fyrir árás en meiðsli hans væru ekki lífshættuleg.
Ákvörðun um lokun skóla var tekin í varúðarskyni á meðan leit að birninum heldur áfram.
Á síðasta ári létust þrettán einstaklingar af völdum bjarnaárása í Japan, fleiri en nokkru sinni áður.
Þrátt fyrir það hefur tilkynningum um birni fækkað verulega. Í september bárust 1.759 tilkynningar um birni á landsvísu samanborið við 4.766 á sama tíma árið áður.
Sérfræðingar telja fjölgun bjarna, fólksfækkun í dreifbýli og breytilegt fæðuframboð í fjalllendi skýra hvers vegna dýrin leita í auknum mæli inn í íbúðahverfi í leit að æti.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
































Athugasemdir