Ellefu mánaða drengur fannst grafinn lifandi í skógi í Bandaríkjunum í síðustu viku. Móðir hans hefur nú tjáð sig um málið í fyrsta sinn síðan faðir drengsins var handtekinn.
Dezarae Sharp ræddi við The New York Times um erfitt samband sitt við Michael Comer, föður sonar þeirra, Koah. Hún sagði einnig frá skilaboðum sem Comer sendi henni skömmu áður en drengurinn hvarf.
Samkvæmt dómsgögnum beitti Comer Sharp ofbeldi í maí síðastliðnum. Hann sparkaði meðal annars í hana og hrinti henni á þurrkara á meðan hún hélt á syni þeirra. Þau hættu saman í kjölfarið.
Comer sat síðar í fangelsi vegna annars máls. Þegar hann losnaði þaðan flutti hann til móður sinnar. Hún sagði Sharp að Comer væri hættur að drekka áfengi og tæki lyf við geðklofa. Eftir það samþykkti Sharp að sonur þeirra væri hjá föður sínum um helgar.
Skömmu áður en drengurinn hvarf sendi Comer fyrrverandi sambýliskonu sinni skilaboð. Hann var ósáttur við hvernig umgengni við son þeirra var háttað og vildi að þau yrðu aftur fjölskylda.
Drengurinn fannst sólarhring eftir að hann hvarf. Hann var í hundabúri sem hafði verið grafið í mold í skóglendi. Björgunarfólk heyrði deyfð gráturhljóð neðan úr jörðinni.
Sharp sagðist aldrei hafa trúað því að faðirinn gæti gert slíkt.
Comer hefur verið handtekinn og meðal annars ákærður fyrir tilraun til manndráps.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
































Athugasemdir