Málefni malbikunarstöðvarinnar Höfða í Reykjavík skekja nú stjórnsýslu Hafnarfjarðarbæjar og valda reiði innan þeirrar reykvísku.
Undirskriftarsöfnum er hafin til að mótmæla því að fyrirtækið fái lóð á Ásvöllum undir starfsemi sína eins og sjá má hér.
Svo virðist sem bæjarstjóri Hafnarfjarðar, Rósa Guðbjartsdóttir, og meirihluti bæjarstjórnar Sjálfstæðisflokks og Framsóknar, hafi ekki vitað af því að til stæði að setja malbikunarstöðina upp í stóru og fjölskylduvænu hverfi í Hafnarfirði. Í það minnsta ef skoðaðar eru fundargerðir bæjarstjórnar um málið:
Bæjarráð – 3577. Haldinn í fundarsal bæjarráðs, Strandgötu 6, 01.07.2021.
2106621 – Höfði, malbikunarstöð. Til umræðu. Bæjarráð lýsir yfir furðu sinni með þau áform sem fréttir berast af um að Malbikunarstöðin Höfði hyggist flytja starfsemi sína til Hafnarfjarðar. Bæjarstjóra er falið að ræða við borgarstjórann í Reykjavík vegna þessa og afla upplýsinga um fyrirætlanir fyrirtækisins, áhrif á umhverfi- og umferð á svæðinu og fleira sem málinu tengist.
Bæjarráð – 3578. Haldinn í fundarsal bæjarráðs, Strandgötu 6, 15.07.2021.
2106621 – Höfði, malbikunarstöð. Til upplýsinga. Bæjarstjóra falið að halda áfram að vinna að málinu.
Ekkert hefur heyrst af málinu síðan frá Rósu og meirihlutanum, og ekkert um nein viðbrögð frá Degi B. Eggertssyni, borgarstjóra Reykjavíkur.
Vænta má svara frá þessum aðilum eftir helgi við fyrirspurn Mannlífs um málið.
Svo virðist sem Rósa og meirihlutinn leggi málið þannig upp að borgarstjóri sé í skjóli nætur að lauma heilli malbikunarstöð frá Reykjavík inn í stórt og fjölskylduvænt hverfi í Hafnarfirði; að Rósa og meirihlutinn hafi hreinlega ekki haft grænan grun um þennan stóra flutning.
Mannlíf hefur talað við fjölda fólks sem kemur með einum eða öðrum hætti að stjórnsýslu Hafnarfjarðarbæjar og Reykjavíkur. Eru svörin flest á eina lund: Að Rósa og meirihlutinn hljóti að hafa vitað af málinu en viljað að það myndi fari leynt. Síðan eftir að málið komst í hámæli er sú aðferð notuð að klína því á Dag borgarstjóra og meirihlutann í Reykjavík; að Dagur B. sé að fara með malbikunarstöðina „bakdyramegin“ til Hafnarfjarðar.
Innan Hafnarfjarðar gætir mikillar ólgu um málið og þá sérstaklega hjá íbúum á Völlunum, sem líst illa á að fá mengandi malbikunarstöð inn í hverfið.
Samkvæmt mjög áreiðanlegum heimildum Mannlífs er það fullyrt að Rósa hafi fyrir löngu vitað af málinu og verið því mjög hlynnt, og segir einn af fjölmörgum heimildarmönnum Mannlífs að sér finnist það „ótrúlega hæpið að bæjarstjóri hafi ekki fengið veður af þessu fyrr. Mínar heimildir segja mér að þetta hafi verið frágengið í byrjun maí. Ég hef komist að því eftir á að þessi flutningur hafði staðið til frá því í lok apríl. Þannig að það að bæjarstjóri hafi ekki vitað af því eru mikil vonbrigði og benda ekki til mikillar hæfni sem bæjarstjóra. Eitt af því sem ég hef velt fyrir mér er spurningin: Væri Rósa að pæla í þessu ef Sjálfstæðisflokkurinn og Framsóknarflokkurinn væru í meirihluta í Reykjavík?“
Annar heimildarmaður sagði í samtali við blaðamann Mannlífs að „oddviti Framsóknarflokksins og formaður bæjarráðs, Ágúst Bjarni Garðarsson, virtist ekki vita af þessu, og það fyrsta sem ég sá voru yfirlýsingar hans á Facebook um að hann ætlaði að setja málið á dagskrá bæjarráðs. Óháð þeim skoðunum sem má hafa á malbikunarstöðvum lyktar þetta af pólitík frekar en malbiki fyrir mér; tengist miklu heldur eignarhaldi á fyrirtækinu en starfseminni sjálfri. Á svæðinu er fyrir malbikunarstöðin Hlaðbær Colas og á umræddri lóð er Munck með starfsleyfi fyrir malbikunarstöð frá júní 2018, sem var veitt á vakt Rósu og meirihlutans.“
Mannlíf mun fjalla meira um málið.
Athugasemdir