Guðmundur Ari Sigurjónsson, þingmaður Samfylkingarinnar, segir galið að Rósa Guðbjartsdóttir ætli að sitja áfram í stjórn SÍS en hún var kosin á Alþingi fyrir hönd Sjálfstæðisflokksins í haust. Þá er hún einnig bæjarfulltrúi í Hafnarfirði.
„Eitt af meginmarkmiðum Sambands íslenskra sveitarfélaga felst í hagsmunagæslu sveitarfélaganna gagnvart ríkisvaldinu. Sambandið mótar stefnu sveitarfélaganna og hefur svo náin samskipti við Alþingi,“ skrifar Guðmundur í færslu á Facebook um málið. Heiða Björg Hilmisdóttir borgarstjóri sagði af sér í gær eftir mikla gagnrýni um að hún væri borgarstjóri og formaður SÍS á sama tíma en sú staða er skilgreind sem 50% vinna.
Hins vegar telur Guðmundur stjórnarsetu Rósu vera hagsmunaárekstur en hún hefur gefið það út að hún muni ekki segja af sér strax, geri hún það yfirhöfuð.
„Það að þingmaður sitji í stjórn sambandsins er algjör hagsmunaárekstur og trúnaðarbrestur við sveitarfélögin í landinu. Þessi ákvörðun Rósu setur alla stjórnina í skrýtna stöðu þar sem þau trúnaðarsamtöl sem fram fara í stjórn Sambandsins fara nú fram með fulltrúa Alþingis á fundunum. Formaður og stjórn Sambandsins þurfa að geta ráðið ráðum sínum og átt í trúnaðarsamskiptum um samskipti við m.a. ríkisstjórnina án þess að þurfa að gæta að því að fulltrúar þingsins séu viðstaddir.“
Að sögn Guðmundar hneyksluðust fulltrúar Sjálfstæðismanna á því að Bjarni Jónsson úr Vinstri Grænum sæti í stjórn SÍS og á Alþingi á sama tíma á síðasta kjörtímabili en hann sagði sig ekki úr stjórninni strax og hann tók sæti á Alþingi.
„Ég skil það vel enda sat ég sjálfur í stjórn Sambandsins þegar ég var kjörinn á þing og sagði mig strax úr stjórninni. Ég sagði mig líka úr bæjarstjórn því fyrir mér er þingmannastarfið fullt starf og ég treysti vel öðrum öflugum fulltrúum Samfylkingar til að taka sæti í bæjarstjórn Seltjarnarness og stjórn Sambands íslenskra sveitarfélaga.
Ég ætla að leyfa öðrum að ræða um launatölur og hvaða mánaðarlaun einstaklingur hefur af skattgreiðendum sem situr á Alþingi, bæjarstjórn Hafnarfjarðar, nefndum á vegum Hafnarfjarðar og stjórn Sambands íslenskra sveitarfélaga. En það sem ég skil ekki er að Hafnfirðingar og Sjálfstæðismenn sætti sig við að kjörinn fulltrúi á þeirra vegum dreifi kröftum sínum á þennan hátt og neiti að hleypa öðrum Sjálfstæðismönnum að trúnaðarstörfum.“
Að lokum spyr Guðmundur hvernig einstaklingur í fullu starfi á Alþingi geti mætt á sama tíma á bæjarstjórnarfundi, nefndarfundi og fundi í stjórn Sambandsins.
Athugasemdir