Sólveig Anna krefst leiguþaks og refsinga við launaþjófnaði

Sólveig Anna Jóns­dóttir, for­maður Eflingar, kallar eftir taf­ar­lausum aðgerðum stjórn­valda til að bæta stöðu verka­fólks og lág­launa­hópa. Í Facebook-færslu segir hún að tvö skref séu sér­stak­lega brýn: að setja leigu­þak og herða lög gegn launa­þjófn­aði.

Hún bendir á dæmi um leigj­anda sem stendur frammi fyrir veru­legri hækkun húsa­leigu. „Mán­að­ar­leiga mun því fara úr 324.00 krónum í 373.000 krónur,“ skrifar hún og segir slíkar hækk­anir gera fólki nær ómögu­legt að leggja fyrir eða stefna að eigin hús­næði.

Sólveig Anna segir stöð­una á leigu­mark­aði ósann­gjarna og gagn­rýnir það sem hún kallar arð­rán. Hún telur nauð­syn­legt að grípa inn í með laga­setn­ingu og setja hemil á þró­un­ina.

Þá leggur hún áherslu á að tekið verði á launa­þjófn­aði með skýrum refsi­á­kvæðum. Hún segir kerf­is­bundin brot á rétt­indum verka­fólks við­gang­ast án afleið­inga og vísar í ályktun Efl­ing­ar­þings þar sem segir: „Hægt er að byggja kerf­is­bundnar van­greiðslur á launum inn í við­skipta­módel fyr­ir­tækj­anna með góðum árangri eins og dæmin sanna.“

Samkvæmt hennar upp­lýs­ingum nema launa­kröfur sem Efling hefur unnið að árin 2024 og 2025 nú þegar yfir 500 millj­ónum króna.

Hún bendir á að í Noregi hafi verið sett lög sem kveða á um allt að tveggja ára fang­elsi fyrir launa­þjófnað, og allt að sex ár í alvar­legum til­vikum. Slík laga­setn­ing myndi, að hennar mati, „snar­minnka allan þann ósóma og rugl sem við­gengst“.

Að lokum segir hún að þó umbætur á hús­næð­is­lána­kerfi séu jákvæðar, þá þurfi að grípa til aðgerða strax. Hún spyr hvort ekki sé tíma­bært að stöðva „þann við­var­andi og við­bjóðs­lega vanda sem launa­þjófn­aður er í lífi verka­fólks“.

„Ég get vel tekið undir með ráð­herra félags­mála að betra hús­næð­is­lána­kerfi sé mjög gott mál. En þangað til að það verður inn­leitt, eftir mörg ár, er þá ekki frá­bær hug­mynd að stoppa þá sið­blindu hegðun sem við­gengst á leigu­mark­aði og stoppa þann við­var­andi og við­bjóðs­lega vanda sem launa­þjófn­aður er í lífi verka­fólks höf­uð­borg­ar­svæð­is­ins? Þá geta þau sem þurfa að þola þetta fárán­lega rugl mögu­lega byrjað að leggja fyrir svo að þau eigi þá séns þegar nýja kerfið kemur á því að kaupa sér eigin íbúð.“