Klukkan 12:45 í dag barst tilkynning um umferðarslys á Hringvegi við Neslönd í Mývatnssveit en þetta kemur fram í tilkynningu frá lögreglunni á Norðurlandi eystra.
Bifreið hafði farið út af veginum og voru tveir í henni. Viðbragðsaðilar frá Þingeyjarsveit, Húsavík og Akureyri voru kallaðir á vettvang.
Annar aðilinn er talinn alvarlega slasaður og þurfti að beita björgunarklippum til að ná honum úr bifreiðinni. Þyrla Landhelgisgæslunnar flutti aðilana af vettvangi á Sjúkrahúsið á Akureyri til frekari aðhlynningar.
Rannsókn á orsökum slyssins stendur yfir. Vegna aðgerða á vettvangi má búast við umferðartöfum á Hringvegi norðan og vestan við Mývatn fram eftir degi. Vegfarendur eru hvattir til að fara um leiðina austan og sunnan við Mývatn.
Athugasemdir