Huginn Þór Grétarsson gagnrýnir það sem hann kallar vaxandi ofbeldi í íslensku samfélagi í pistli á Vísi. Hann segir um að ræða skipulagt hópeinelti sem fái að viðgangast án nægra viðbragða.
„Þessi hópur gerenda er samsettur af fólki sem blindast af reiði og telur sig mega beita ofbeldi því það HELDUR að viðkomandi sem þolir árásirnar hafi gert eitthvað ósæmilegt,“ skrifar hann.
Huginn segir algengt að einstaklingar verði fyrir opinberu níði sem þróist í hópeinelti:
„Einn ólánsamur „svartur sauður“ er tekinn fyrir í einu, þar til hann liggur eftir óvígur og sá næsti verður fyrir barðinu.“
Hann bendir á að afleiðingarnar geti verið alvarlegar og langvarandi:
„Árásirnar eru endurteknar og standa jafnvel yfir árum saman. Sumir missa allt, lifibrauð sitt og mannorð.“
Hann bætir við að þolendur verði oft félagslega einangraðir og útilokaðir:
„Þolandi þessa eineltisofbeldis verður eins og heit kartafla… enginn vill snerta á neinu sem tengist viðkomandi.“
Jafnframt heldur hann því fram að opinberir aðilar taki stundum þátt í slíkri hegðun og að samfélagið sýni meðvirkni með þögn sinni.
„Starfsfólk hjá hinu opinbera tekur líka þátt og fer að refsa viðkomandi eftir fremsta megni, t.d. með því að loka á viðskipti, eða lágmarka þau. Það misnotar stöðu sína til að slást í hóp ofbeldislýðsins og beitir stjórnsýslunni til þess.“
Í lokin varar hann við áhrifum á tjáningarfrelsi og kallar eftir því að þessi hegðun verði fordæmd:
„Við eigum að taka á þessari ofbeldishegðun og fordæma hana, eins og allt annað ofbeldi.“
Athugasemdir