Alls gista fjórir einstaklingar í fangaklefa á höfuðborgarsvæðinu eftir nóttina, samkvæmt dagbók lögrelgunnar. Frá klukkan 17:00 í gær til 05:00 í morgun eru 102 mál bókuð í kerfum lögreglunnar. Hér má líta nokkur dæmi um þau verkefni sem lögreglan leysti af hólmi á tímabilinu.
Einn einstaklingur var handtekinn, grunaður um rúðubrot og var hann vistaður í fangaklefa á Hverfisgötu í þágu rannsóknar málsins.
Óskað var eftir aðstoð lögreglu á skemmtistað vegna einstaklings sem grunaður var um að stela áfengi á staðnum. Var hann handtekinn en látinn laus eftir skýrslutöku.
Þá var óskað eftir lögreglu á hótel vegna sótölvaðs einstaklings sem var til vandræða. Var hann handtekinn og vistaður í fangaklefa á Hverfisgötunni þar til hægt verður að ræða við hann.
Líkamsárás var einnig tilkynnt utan við skemmtistað í miðborginni en var einn handtekinn og síðan látinn laus að lokinni skýrslutöku.
Einnig hafði lögreglan á Hverfisgötu afskipti af einstaklingi en sá tók á rás þegar hann var spurður um nafn. Ekki komst hann þó langt þar sem lögreglumennirnir voru talsvert sprettharðari. Reyndist einstaklingurinn vera með ætluð fíkniefni á sér og því handtekinn. Var hann látinn laus að lokinni skýrslutöku.
Gríðarmörg tilfelli var um akstur undir áhrifum áfengis og/eða fíkniefna en einn þeirra ökumanna reyndist vera með tvö eggvopn á sér þegar lögreglan stöðvaði hann. Var hann handtekinn en látinn laus að lokinni skýrslutöku.
Sama lögregla hafði einnig afskipti af einstaklingi sem var að trufla störf lögreglu. Neitaði kauði að gefa upp hver hann væri og var hann því handtekinn. Þegar á lögreglustöðina á Hverfisgötu var komið neitaði hann enn að segja til nafns. Var hann því vistaður í fangaklefa þar til hægt er að komast að nafni hans.
Þá var óskað eftir aðstoð lögreglu að skemmtistað vegna einstaklings sem var í tökum dyravarða. Einstaklingurinn var á peruinni og er hann vistaður í fangaklefa þar til hægt verður að taka af honum skýrslu.
Óskað var eftir aðstoð lögreglunnar á Vínlandsleið vegna einstaklings sem var með ógnandi hegðun við þann sem tilkynnti málið. Á meðan lögreglan var á leiðinni braut einstaklingurinn rúðu hjá tilkynnanda. Var hann handtekinn vegna gruns um rúðubrotið. Reyndist hann andlega veikur og var fluttur á bráðamóttöku til skoðunar.
Athugasemdir