Franskt handverksbrugghús í Bretagne-héraði hefur nánast selt upp lager sinn af bjórnum „John Lemon“ eftir að hafa fengið kröfu frá Yoko Ono um að hætta notkun vörumerkisins vegna tengingar við eiginmann hennar heitinn, John Lennon.
Aurelien Picard, eigandi brugghússins Brasserie de l’Imprimerie í bænum Bannalec í norðvesturhluta Frakklands, sagði í samtali við AFP-fréttastofuna að lögmenn Ono hefðu í lok mars sent fyrirtækinu tilkynningu þar sem þess var krafist að framleiðslu og sölu undir nafninu „John Lemon“ yrði hætt tafarlaust. Að öðrum kosti þyrfti brugghúsið að greiða háar sektir og þóknanir fyrir notkun nafnsins.
Samkvæmt Picard voru nefndar fjárhæðir allt að 100 þúsund evrur, auk dagsekta sem gátu numið frá 150 upp í 1.000 evrur á dag ef brugghúsið yrði ekki við kröfunum.
Eftir viðræður náðist samkomulag um að brugghúsið mætti selja þær um 5.000 flöskur sem eftir voru af bjórnum fram til 1. júlí, en að framleiðslu undir nafninu yrði síðan hætt.
Deilan vakti þó mikla fjölmiðlaathygli sem reyndist brugghúsinu óvænt auglýsing. Á örfáum dögum seldist stærstur hluti birgðanna upp og sagði Picard að færri en 1.000 flöskur væru nú eftir.
„Þetta var hálfgerð vitleysa, en á sama tíma dálítið fyndið miðað við ófarir okkar,“ sagði hann.
„John Lemon“ var fyrst settur á markað fyrir fimm árum og sagði Picard að nafnið hefði einfaldlega þótt „svalt“. Brugghúsið framleiðir einnig aðra bjóra sem vísa með leikandi hætti í nöfn frægra einstaklinga.
Brasserie de l’Imprimerie er lítið fjölskyldurekið brugghús með tvo starfsmenn og framleiðir árlega á bilinu 50 til 80 þúsund flöskur sem seldar eru aðallega til veitingastaða og vínverslana innan um 40 kílómetra radíuss frá Bannalec.
Nú stendur fyrirtækið frammi fyrir því að finna nýtt nafn á ljósa sítrónubragðaða bjórinn. Picard sagðist hafa stungið upp á nafninu „Jaune Lemon“, þar sem „jaune“ merkir gulur á frönsku, en lögmenn Ono hefðu ekki fallist á þá lausn.
Athugasemdir