Ari Edwald, oddviti Miðflokksins í Reykjavík, varar við innflytjendum í myndbandi sem hann birti á samfélagsmiðlum í gær.
Í myndbandinu, sem notast við streituvaldandi undirspil, lýsir Ari því yfir að borgarbúar upplifi ekki sömu öryggistilfinningu og áður og segir að dæmum um grafalvarleg atvik fjölgi. Fylgja með skjáskot úr fréttum þar sem grunaðir gerendur eru erlendir. Bendir forstjórinn fyrrverandi á innflytjendastefnu ríkisins sem sökudólg í þeim efnum. Hvetur Ari fólk til að kjósa Miðflokkinn í komandi sveitarstjórnarkosningum til að hægt sé koma þessum málum í lag í borginni.
Óhætt er að segja að myndband þetta hafi vakið mikla athygli á samfélagsmiðlum eins og Facebook og TikTok.
„Verið hrædd! Vantreystið nágrönnum ykkar! Kjósið Miðflokkinn…“ skrifar blaðamaðurinn fyrrverandi Atli Þór Fanndal um myndbandið.
„Hvað ætli Miðflokkurinn hyggist fyrir til að koma í veg fyrir að síðmiðaldra íslenskir áhrifakarlar ógni öryggi kvenna í einkasamkvæmum eða á opinberum vettvangi?“ spyr Sóley Tómasdóttir, fyrrverandi borgarfulltrúi.
Halldór Auðnar Svansson, annar fyrrverandi borgarfulltrúi, skrifar: „Það á greinilega að keyra bara á þessu fram að kosningum. Back to basics. Þegar upp er staðið snýst þessi flokkur um nákvæmlega ekkert annað en en skíta yfir innflytjendur. Ekkert uppbyggilegt, engar lausnir, bara neikvæðar tilfinningar og raus.“
Vekur myndbandið sérstaklega mikla athygli í ljósi þess að Ari var sjálfur innflytjandi í Portúgal fyrr á þessu ári.
Athugasemdir