Halldór Halldórsson, betur þekktur sem Dóri DNA, gagnrýnir harðlega umræðuna um Borgarlínuna í langri færslu sem hann birti á samfélagsmiðlinum X. Þar segist hann óttast að breytingar á verkefninu geti eyðilagt það sem hann telur eitt mikilvægasta og metnaðarfyllsta skipulagsverkefni Reykjavíkur í áratugi.
Dóri segir umræðuna fyrir komandi kosningar hafa einkennst af hrópum og einföldunum þar sem andstæðingar Borgarlínunnar horfi aðeins á verkefnið sem samgönguframkvæmd en ekki heildstæða borgarþróun.
Hann nefnir sérstaklega skipulagið við Suðurlandsbraut sem dæmi um hvernig Borgarlínan geti umbreytt borginni með nýjum borgargötum, þjónustu og íbúðabyggð í kringum stoppistöðvar.
Stærsti hluti færslunnar beinist þó að Hildi Björnsdóttur, oddvita Sjálfstæðisflokksins í Reykjavík, sem hann segir hafa snúið baki við verkefninu þrátt fyrir að hafa áður verið eindreginn stuðningsmaður þess.
„Þvílík vonbrigði að sjá eftir Hildi Björns fara þennan veg,“ skrifar Dóri og segist hafa heyrt hana tala „af innlifun“ um Borgarlínuna áður fyrr. Hann bendir á að hún hafi stutt allar helstu ákvarðanir sem hafi komið verkefninu á þann stað sem það er í dag.
„Og svo er hún mætt til Tóta að hnussa og fussa og láta eins og þetta sé eitthvað tómt píp úr einhverjum galgopum á Kaffi Vest. Djöfulsins drasl.“
Þá rifjar hann upp persónulegt samtal þeirra á veitingastaðnum Hosiló í vetur þar sem hún hafi spurt hann hvort hann hefði áhuga á að taka sæti á lista Sjálfstæðisflokksins fyrir komandi kosningar.
„Þá var hún talsmaður Borgarlínunnar. Hvað gerðist í millitíðinni – ég veit það ekki,“ skrifar hann.
Dóri gagnrýnir jafnframt stjórnmálafólk sem tali fyrir aukinni uppbyggingu í útjaðri borgarinnar samhliða loforðum um minni umferð.
„Þau ætla að laga umferðina með því að bæta við bílum í hana,“ skrifar hann og bætir við: „Ég veit ekki alveg hvað maður segir við þessu. Er þinn frambjóðandi heimskur? eða er hann lygari?“
Segir Dóri einnig að það sé ekki tilvijun að aðeins „gamlir karlar“ skrifi grein gegn Borgarlínunni:
„Borgarlínan er svo fokking vandað verkefni. Og það er ekki að ástæðulausu að það eru bara gamlir karlar sem skrifa greinar gegn henni - (og enginn þeirra minnist á skipulagsþáttinn).“
Rapparinn og rithöfundurinn beitir kaldhæðninni af list í næstu orðum sínum:
„En þú veist, líklega mun þetta fara til fjandans. Ég jafna mig, heima vorum við Alþýðubandalagsfólk á meðan Davíð Oddsson var Davíð Oddsson og við kunnum þá list að éta skít betur en aðrir. Ég verð samt að reykja vindil og hlusta á rapp.“
Í lok færslunnar tekur hann sérstaklega fram að hann hafi aldrei kosið Samfylkingin og myndi aldrei taka sæti á lista Sjálfstæðisflokkurinn, þrátt fyrir samtalið við Hildi.
Athugasemdir