Hallgrímur Helgason rithöfundur vísar því alfarið á bug á Facebook að hann hafi valdið skemmdum á embættisbifreið Geirs H. Haarde, þáverandi forsætisráðherra, í mótmælum eftir bankahrunið árið 2008. Segir hann fullyrðingar Hannesar Hólmsteins Gissurarsonar, prófessors emeritus, um málið vera rangar og byggðar á ósannindum.
Deilan blossaði upp í kjölfar nýlegs sjónvarpsþáttar á RÚV um Davíð Oddsson, þar sem Hallgrímur var meðal viðmælenda. Hannes gagnrýndi það harðlega á Facebook og sagði óviðeigandi að eini maðurinn sem ráðist hefði á bíl forsætisráðherra fengi að tjá sig um annan forsætisráðherra.
Þá fullyrti Hannes að árás Hallgríms hefði valdið skemmdum á bílnum sem kostað hefðu hundruð þúsunda króna í viðgerðir og að aldrei hefði verið reynt að innheimta þann kostnað.
Hallgrímur hafnar þessu alfarið. Í færslu á Facebook segir hann að aðeins hafi verið um „bank á rúðu og reiðihróp“ að ræða og að engar skemmdir hafi orðið á bifreiðinni. Bendir hann jafnframt á að Geir Haarde hafi sjálfur lýst atvikinu í ævisögu sinni og þar komi ekkert fram um skemmdir af hans völdum.
Fleiri hafa stigið fram Hallgrími til stuðnings. Eyþór Gunnarsson tónlistarmaður sagðist hafa staðið við hlið hans og fullyrðir að bíllinn hafi ekki skemmst. Fréttaljósmyndarinn Gunnar V. Andrésson tekur í sama streng og segir ekkert skemmdarverk hafa átt sér stað af hálfu Hallgríms en hann var á staðnum að taka myndir. Þá segir fjölmiðlamaðurinn Egill Helgason að Hannes fari með „kjaftæði“ í málflutningi sínum.
Athugasemdir