Skoska lögreglan hefur ákært 36 ára gamlan karlmann í tengslum við röð ofbeldisverka í Edinborg á föstudag þar sem fimm menn slösuðust. Málið er rannsakað sem hugsanlegt hatursglæpamál.
Í tilkynningu frá lögreglunni í Skotlandi kemur fram að maðurinn hafi verið handtekinn eftir að fjölmargar tilkynningar bárust vegna árása, hótana, ráns og skemmdarverka víðs vegar um borgina. Lögregla segir ekki lengur stafa hætta af manninum fyrir almenning.
Fórnarlömbin eru fimm karlar á aldrinum 22 til 39 ára. Þrír þeirra voru fluttir á sjúkrahús með áverka sem ekki eru taldir lífshættulegir. Hinir tveir hlutu einnig meiðsl af ýmsum toga.
Myndefni sem birtist á samfélagsmiðlum sýndi mann, sagðan vera hinn grunaða, ganga um götur Edinborgar beran að ofan og vopnaðan stóru eggvopni. Lögregla hefur þó ekki veitt frekari upplýsingar um vopnið að svo stöddu.
Forsætisráðherra Bretlands, Keir Starmer, fordæmdi árásirnar harðlega og sagði í færslu á samfélagsmiðlum að allt benti til þess að hinn grunaði hefði verið knúinn áfram af andúð í garð múslima.
„Þetta er algjörlega skelfilegt. Ég mun ekki umbera slíkt og viðkomandi mun sæta fullri ábyrgð samkvæmt lögum,“ sagði Starmer.
Forsætisráðherra Skotlands, John Swinney, lýsti einnig yfir miklum áhyggjum vegna málsins og sagði að ofbeldi, kynþáttahatur og umburðarleysi ættu engan stað í skosku samfélagi.
Maðurinn mun koma fyrir dóm á næstunni.
Athugasemdir