Héraðsdómur Reykjaness hefur dæmt Björn Harðarson í 30 daga skilorðsbundið fangelsi fyrir líkamsárás gegn 13 ára dreng í Salalaug í Kópavogi. Dómurinn taldi jafnframt sannað að háttsemi hans bryti gegn barnaverndarlögum.
Samkvæmt ákæru átti atvikið sér stað 10. október 2023 þegar Björn gekk að drengnum í heitum potti, greip um háls hans með annarri hendi og ýtti honum aftur á bak þannig að háls hans sveigðist aftur og hann átti erfitt með að anda. Áður höfðu drengurinn og félagar hans verið með hávaða í gufubaði sundlaugarinnar, sem leiddi til orðaskipta milli þeirra og Björns.
Björn neitaði sök fyrir dómi. Hann hélt því fram að hann hefði aðeins ýtt lauslega við drengnum eftir að hafa orðið fyrir sífelldu áreiti af hans hálfu og hafnaði því að hafa tekið hann hálstaki eða beitt ofbeldi.
Dómurinn féllst ekki á þá skýringu. Þar var vísað til samhljóða framburðar brotaþolans, tveggja vina hans og starfsmanns Salalaugar, auk upptaka úr eftirlitsmyndavélum sundlaugarinnar. Að mati dómsins sýndu upptökurnar glögglega að Björn tók drenginn um hálsinn og ýtti honum aftur á bak. Framburður drengsins var talinn stöðugur, trúverðugur og studdur öðrum gögnum málsins, en frásögn Björns þótti hvorki fá stoð í vitnisburði né myndbandsupptökum.
Við ákvörðun refsingar leit dómurinn meðal annars til þess að drengurinn hlaut ekki varanlegt líkamstjón. Á hinn bóginn þótti alvarlegt að um hefði verið að ræða árás fullorðins manns á 13 ára barn í almenningssundlaug. Einnig kom fram að verulegur og óútskýrður dráttur hefði orðið á rannsókn málsins, sem Birni yrði ekki kennt um. Refsingin var því ákveðin 30 daga fangelsi en fullnustu hennar frestað til tveggja ára, haldi hann almennu skilorði.
Þá var Birni gert að greiða föður drengsins, fyrir hönd sonar síns, 300 þúsund krónur í miskabætur auk vaxta og dráttarvaxta. Honum var jafnframt gert að greiða rúmlega 1,3 milljónir króna í sakarkostnað, þar á meðal málsvarnarlaun verjanda síns og þóknun réttargæslumanns brotaþolans.
Athugasemdir